Agron Tufa vjen në Gjenevë me librin “Njeriu buzë lumit”

Në sallonin tradicional të librit që mbahet në Gjenevë nga 19 deri më 23 mars do të prezantohen edhe një numër autorësh shqiptarë. Aktualisht autorët shqiptarë që prezantohen në stendën e Lise’s Bookstore janë: Ag Apolloni, Enver Dugolli, Agron Tufa, Elvana Zaimi-Tufa, Rita Petro, Shemsi Makolli, Tom Kuka, Edlira Dedja, Argjira Kastrati.

Albinfo.ch ua prezanton kësaj radhe autorin Agron Tufa. Në ditët në vijim do të prezantojmë edhe autorë të tjerë.

Kush është Agron Tufa ?

Agron Tufa u lind në Dibër. Ka studiuar për letërsi dhe shkenca letrare në Fakultetin e Historisë dhe Filologjisë në Universitetin Shtetëror të Tiranës, në Institutin e Letërsisë Botërore “A.M. Gorki” dhe në Institutin e Kulturave Europiane – IEK (Moskë). Ka qenë për shumë vite pedagog i Letërsisë së Huaj të shekullit XX-XXI në Fakultetin Filologjik të Universitetit të Tiranës.

Cilat janë veprat e Agron Tufës ?

Është autor i mbi 20 librave me poezi, romane, tregime, ese dhe studime. Gjithashtu Tufa është një përkthyes i spikatur i një numri të madh poetësh, romancierësh dhe veprash filologjike, ndër të cilët veprat e Pushkinit, Dostojevskit, Tolstoit, Leskovit, Zamjatinit, Bullgakovit, Majakovskit, Mandelshtamit, Josif Brodskit, etj. Është fitues i shumëfishtë i çmimeve letrare kombëtare dhe ndërkombëtare.

Cili është libri i Tufës që  prezantohet sivjet në Gjenevë ?

Të shtunën më 22 mars nga ora 14h – 16h Agron Tufa jep dedikase (prezanton dhe jep autografe) të librit “Njeriu buzë lumit”.

“Njeriu buzë lumit” është vëllimi i tetë poetik i Agron Tufës. Në këtë vëllim mbizotëron një pasuri e larmishme metrash e formash poetike, një gjuhë e mbrujtur metaforike që gjakon të shprehë imazhet dhe gjendjet efemere, që i rrëshqasin verbalizimit. Spikat lirika filozofike dhe zhanri i elegjisë. Vëllimin e përshkon rravgimi i vazhdueshëm i njeriut të kredhur në vorbullën e Kohës, njeriu në rrjedhën e Kohës, sikundërse dhe fuqia rrënuese e tranformuese e Kohës, ajo se çfarë është në gjendje të bëjë Koha me Njeriun. Lumi është një imazh heraklitian mbi rrjedhën e kohës, historisë, moshës së njeriut nga fëmijëria drejt mbarimit dhe gjurma e tij e pashlyeshme në kujtesë. Kategoritë metafizike që e përshkojnë vëllimin janë kapërthimi i Gjuhës, Kohës, Kujtesës, Dashurisë dhe Vdekjes.

Mos e harroni këtë ngjarje! Nga 19 deri më 23 mars, ju presin dyert e hapura të Sallonit të librit në Palexpo të Gjenevës. Agron Tufa ju pret me veprën e tij jo vetëm sa për të pasuruar bibliotekat e juaja, por ai do të jetë aty edhe për dedikim të librit dhe për tu njohur dhe shkëmbyer së bashku.

The post Agron Tufa vjen në Gjenevë me librin “Njeriu buzë lumit” appeared first on Albinfo.