Përçarje dhe përplasje në radhët e Frontit Evropian: Partnerët e koalicionit ndihen të tradhtuar nga Ali Ahmeti

Përçarje dhe tensione kanë shpërthyer brenda Frontit Evropian pas raportimeve se kreu i BDI-së, Ali Ahmeti, ka zhvilluar takime të fshehta me liderin e Aleancës për Shqiptarët (ASH), Arben Taravari, pa informuar partnerët e tij në koalicion.

Sipas burimeve brenda Frontit Evropian, këto bisedime të fshehta kanë ngritur dyshime të mëdha mes partive aleate, të cilat ndihen të anashkaluara dhe tradhtuara nga mungesa e transparencës.

Partnerët e koalicionit po kërkojnë shpjegime mbi natyrën e këtyre takimeve dhe përmbajtjen e marrëveshjes së mundshme mes Ahmetit dhe Taravarit. Ata janë ndjerë të shpërfillur e të tradhtuar nga kreu i BDI-së edhe lidhur me ndarjen e komunave. Nga burime të brendshme merret vesh se ndarja e komunave është bërë 6 me 6, pra 6 komuna i janë ndarë BDI-së dhe 6 ASH-së. Të tjerat janë konsideruar si komuna të humbura ose që nuk fitohen. Merret vesh se për Strugën ka pasur mospajtime, por kjo mbetet të dalë në pah më vonë.

“Çfarë fshihet pas kësaj mos transparence? Çfarë marrëveshjeje sekrete është arritur mes Ahmetit dhe Taravarit?” – pyesin zëra brenda koalicionit, duke shtuar se sipas tyre kjo marrëveshje tashmë është një akt i kryer, dhe se çështja tani mbetet vetëm se kur do të bëhet publike.

Këto zhvillime kanë krijuar tensione të reja në vetë FE, duke vënë në pikëpyetje funksionimin në prag të humbjes që pret në zgjedhjet lokale të tetorit.

The post Përçarje dhe përplasje në radhët e Frontit Evropian: Partnerët e koalicionit ndihen të tradhtuar nga Ali Ahmeti appeared first on