BE vendos shkëputjen nga karburantet ruse nga viti 2027

Bashkimi Evropian ka vendosur që deri në vitin 2027 të ndalë përfundimisht importin e naftës dhe gazit nga Rusia. Plani parashikon një shkëputje graduale që nis me ndalimin e kontratave të reja dhe afatshkurtra brenda vitit 2025 dhe vijon me ndërprerjen e kontratave afatgjata, të cilat përbëjnë dy të tretat e importeve të gazit rus.

Si pjesë e masave, do të ndërpritet edhe përdorimi i ashtuquajturës “flotë hije” – anije që transportojnë karburante ruse në mënyrë të fshehtë – si dhe importi i uraniumit dhe materialeve të tjera bërthamore nga Rusia. Vendet anëtare do të detyrohen të hartojnë plane kombëtare që tregojnë se si do të largohen nga burimet energjetike ruse.

Ky plan, që pritet të miratohet në formë ligji, është shtyrë disa herë për shkak të zhvillimeve gjeopolitike, përfshirë ndërhyrjet diplomatike të ish-presidentit amerikan Donald Trump në konfliktin Rusi-Ukrainë.

Megjithatë, disa shtete anëtare kanë shprehur kundërshti. Sllovakia dhe Hungaria kanë sinjalizuar se mund të vendosin veton ndaj këtij vendimi. Kryeministri sllovak, Robert Fico, e ka quajtur iniciativën “tërësisht të papranueshme”.

Pavarësisht kundërshtimeve, presidentja e Komisionit Evropian, Ursula von der Leyen, ka qenë e prerë: “Epoka e karburanteve ruse në Evropë po shkon drejt fundit,” u shpreh ajo para Parlamentit Evropian në Strasburg.

The post BE vendos shkëputjen nga karburantet ruse nga viti 2027 appeared first on Albinfo.