“Dita e çlirimit”, Trump shpall sot planin tarifor/ Vendimi shënjestron një listë të gjerë shtetesh

Presidenti Amerikan Donald Trump do të shpallë sot tarifa të reja reciproke gjithëpërfshirëse ndaj partnerëve globalë, duke përmbysur tregtinë e bazuar në rregulla e duke rritur kostot.

Plani tarifor do të njoftohet pasdite dhe Shtëpia e Bardhë ka konfirmuar se tarifat do të hyjnë në fuqi menjëherë. Në raportin e tregtisë të publikuar një ditë më parë, administrata e Trump la të kuptohet se lista e shteteve që do të tarifohen do të jetë e gjatë.

Tregjet financiare ndërkohë po luhaten mes pasigurisë pak para shpalljes së tarifave në të ashtuquajturën “Dita e Çlirimit” nga Trump. Tregjet e aksioneve amerikane u tërhoqën lehtë, teksa dollari amerikan mbeti i qëndrueshëm këtë mesjavë megjithatë investitorët janë skeptikë për ecurinë e monedhës së gjelbër në vijim.

Edhe Bitcoin pa një rritje të lehtë duke u ngjitur në 85 mijë dollarë, megjithëse mbetet shumë poshtë niveleve rekord që preku në fillim të vitit. Ecurinë më të mirë në këtë periudhë të pasigurt e ka pasur ari I cili vijon të rritet me ritme të shpejta.

Çmimet e arit u zgjeruan me 0.5% të mërkurën duke prekur nivelin e 3 125 dollarë për onz. Ari është rritur me gati 19% përgjatë këtij viti, si një aset i sigurt në periudha të paqendrueshme ekonomike dhe politike.

Ndërsa çmimet e naftës u tërhoqën lehtë në tregjet globale në mes javë nga frika e luftës tregtare dhe dobësimi i kërkesës për naftë. Kontratat feature të naftës brent ranë në 74.4 dollarë për fuçi të mërkurën.

/ abcnews.al