Finlanda përfundon hetimin për dëmtimin e kabllove në Baltik, dyshohet ekuipazhi i një tankeri nafte

Autoritetet finlandeze kanë përfunduar hetimin mbi dëmtimin e kabllove nënujore të energjisë dhe telekomunikacionit në Detin Baltik, ngjarje e ndodhur në dhjetor të vitit të kaluar. Prokuroria po shqyrton mundësinë e ngritjes së akuzave ndaj tre oficerëve të lartë të një tankeri nafte, të cilët dyshohet se janë përgjegjës për incidentin.

Sipas Policisë Kombëtare të Finlandës dhe Prokurorisë, tankeri Eagle S, i regjistruar në Ishujt Cook, dyshohet se ka dëmtuar kabllon energjetike nënujore Estlink 2 që lidh Finlandën me Estoninë, si dhe katër linja interneti, duke tërhequr ankorën e tij përgjatë shtratit të detit.

Hetimi, i udhëhequr nga Byroja Kombëtare e Hetimit të Finlandës, përfundoi të premten. Në deklaratën zyrtare thuhet se tre oficerët e anijes dyshohen për dëmtim të rëndë të pronës dhe ndërhyrje në rrjetet e telekomunikacionit.

Regjioni i Detit Baltik ka qenë në gjendje gatishmërie të lartë për shkak të disa incidenteve me rrjetet nënujore të energjisë, gazsjellësve dhe linjave të telekomunikacionit – një pjesë e të cilave dyshohet për sabotim, ndërsa të tjera mund të jenë rezultat i aksidenteve teknike. / abcnews.al