Gjermania ndër vendet me përqindjen më të lartë të punës nga shtëpia në botë

Gjermania renditet ndër vendet ku puna nga shtëpia është më e përhapur, veçanërisht në mesin e të diplomuarve universitarë. Sipas një analize të re të Institutit të Ekonomisë ifo, gjermanët punojnë mesatarisht 1.6 ditë në javë nga shtëpia, një shifër që tejkalon dukshëm mesataren globale prej 1.2 ditësh, shkruan DW, transmeton albinfo.ch.

Studimi përfshiu të dhëna nga 40 vende dhe fokusohet tek punonjësit me arsim të lartë, që punojnë me kohë të plotë të paktën gjashtë orë në ditë. “Pavarësisht shembujve të kompanive që kërkojnë rikthimin e punonjësve në zyrë, rezultatet tona tregojnë se puna nga shtëpia ka mbetur e qëndrueshme që nga viti 2023,” tha studiuesi i ifo, Mathias Dolls.

Në Evropë, vetëm Finlanda tejkalon Gjermaninë me një mesatare prej 1.7 ditësh pune nga shtëpia në javë. Në shkallë globale, rekordin e mban Kanadaja me 1.9 ditë, pasuar nga Mbretëria e Bashkuar me 1.8 ditë. SHBA dhe India qëndrojnë në të njëjtin nivel me Gjermaninë, ndërsa vende si Koreja e Jugut (0.5 ditë), Kina dhe Greqia (0.6 ditë secila) kanë normat më të ulëta, transmeton albinfo.ch.

Sipas raportit, prindërit e fëmijëve të vegjël janë ata që më shpesh ndajnë javën e tyre të punës mes shtëpisë dhe vendit të punës. Ndërkohë, ata pa fëmijë priren të punojnë plotësisht ose në distancë, ose në zyrë. Diferenca gjinore është minimale, por dëshira për të punuar nga shtëpia është më e theksuar tek gratë me fëmijë sesa tek gratë pa fëmijë.

Rezultatet nënvizojnë një ndryshim të qëndrueshëm në kulturën globale të punës, me Gjermaninë si një nga shembujt më të dukshëm të përqafimit të fleksibilitetit në punë pas pandemisë, transmeton albinfo.ch.

The post Gjermania ndër vendet me përqindjen më të lartë të punës nga shtëpia në botë appeared first on Albinfo.