Greqi, roja bregdetare shpëton qindra emigrantë në jug të Kretës

Roja bregdetare greke ka shpëtuar qindra emigrantë nga vështirësitë në det – në jug të ishullit të Kretës.

“Rreth 700 persona u shpëtuan nga anijet që vinin nga Libia”, sipas radios greke “ERTnews”

Anijet thuhet se po lundronin në ujëra ndërkombëtare, të paafta për të manovruar. Shumë emigrantë të shpëtuar sot në mëngjes iu nënshtruan ekzaminimeve mjekësore ndërsa identiteti i tyre po verifikohet.

“Ata do të transferohen në kampet e regjistrimit”, sipas gazetarëve vendas.

Katër anije mallrash morën pjesë gjithashtu në operacionin e shpëtimit. Gjatë javëve të fundit, një numër më i madh emigrantësh kanë mbërritur në brigjet e Kretës.

Rreth 400 emigrantë u shpëtuan dje pranë ishullit Gavdos, në jug të Kretës, në tre operacione të ndryshme. Të shpëtuarit thanë se ishin nisur drejt Kretës nga porti libian i Tobrukut.

“Emigrantët vijnë nga vendet e Afrikës së Veriut dhe Lindjes së Mesme”, tha roja bregdetare.

Sipas agjencisë së OKB-së për refugjatët (UNHCR), 3 430 emigrantë kanë mbërritur në Kretë që nga fillimi i vitit deri më 11 maj.

“Me mbërritjet e reja, një total prej rreth 6 500 emigrantësh kanë mbërritur në ishull”, sipas medias greke.

Qeveria në Athinë po bën thirrje për një shpërndarje më të drejtë të barrës së refugjatëve brenda BE-së dhe po i reziston planeve në Gjermani për të dërguar refugjatët sërish në Greqi nëse atyre u është dhënë tashmë azil atje.