Hamas pranon paqen, por me kushte: Paqe të përhershme, largim të izraelitëve dhe garantim të ndihmave

Grupi palestinez Hamas i është përgjigjur një propozimi amerikan për armëpushim në Gaza. Hamas tha se marrëveshja e propozuar nga i dërguari i Donald Trump për Lindjen e Mesme, parashikon lirimin e 10 pengjeve dhe 18 trupave në këmbim të lirimit nga Izraeli të një numri të burgosurish palestinezë.

Hamasi tha gjithashtu se kërkon të arrijë një armëpushim të përhershëm në Gaza, një tërheqje gjithëpërfshirëse të forcave izraelite dhe të sigurojë rrjedhën e ndihmave në territor.

Këto kërkesa janë thelbësore për Hamasin, në një kohë kur Gaza ka nevojë për një fluks ndihmash vetëm për të kompensuar mungesën e shumë furnizimeve bazë.

Tërheqja e plotë e ushtrisë izraelite nga Rripi i Gazës dhe rrjedha e lirë e ndihmës, këto ishin dy çështjet kryesore në fazën e parë të armëpushimit të mëparshëm.

Dallimet e thella midis Hamasit dhe Izraelit kanë penguar përpjekjet e mëparshme për të rivendosur një armëpushim që u thye në mars.

Izraeli ka këmbëngulur që Hamasi të çarmatoset plotësisht, të shpërbëhet si forcë ushtarake dhe qeverisëse dhe të kthejë të 58 pengjet që mbahen ende në Gaza përpara se të bjerë dakord të përfundojë luftën.

Hamasi ka hedhur poshtë kërkesën për të hequr dorë nga armët dhe thotë se Izraeli duhet të tërheqë trupat e tij nga Gaza dhe të angazhohet për t’i dhënë fund luftës.

Izraeli e nisi luftën e tij në Gaza në përgjigje të sulmit të Hamasit më 7 tetor 2023, që vrau rreth 1,200 njerëz dhe 251 izraelitë u morën peng në Gaza.

Fushata pasuese ushtarake izraelite ka vrarë më shumë se 54,000 palestinezë, thonë zyrtarët e shëndetësisë në Gaza, dhe e ka lënë enklavën në rrënoja.