Haradinaj: E keqja ka emër – Albin Kurti

Një reagim i tillë ka ardhur një ditë pasi kryetari i Nismës Socialdemokrate, Fatmir Limaj – partneri i koalicionit i AAK-së në Zgjedhjet Parlamentare të 9 shkurtit – deklaroi se NISMA e AAK janë parti të ndara, andaj edhe nuk e kanë të domosdoshme të votojnë njëjtë.

“E keqja ka emër – Albin Kurti”.

Kështu ka shkruar kryetari i Aleancës për Ardhmërinë e Kosovës, Ramush Haradinaj, në platformën sociale në Facebook, të premten në mëngjes.

Një reagim i tillë ka ardhur një ditë pasi kryetari i Nismës Socialdemokrate, Fatmir Limaj – partneri i koalicionit i AAK-së në Zgjedhjet Parlamentare të 9 shkurtit – deklaroi se NISMA e AAK janë parti të ndara, andaj edhe nuk e kanë të domosdoshme të votojnë njëjtë.

“Duhet ta kuptojmë se ne jemi dy parti politike. Nuk e kemi të domosdoshme të votojmë njëjtë për çështje të ndryshme”, tha ai në një intervistë për RTV Dukagjini, duke lënë të hapur mundësinë që deputetët e Nismës Socialdemokrate mund të votojnë për formimin e qeverisë së ardhshme, në krye me Albin Kurti.

I pyetur se a ka vija të kuqe me ndonjërën nga partitë politike kryesore në vend, Limaj ka potencuar se në kontekstin e çështjeve nacionale, ai është i gatshëm të ulet në tavolinë me çdo parti.

“Kush të më fton në tavolinë, unë shkoj e ulna, për tema nacionale”, ka shtuar ai.

Gjatë intervistës, Limaj, ka bërë thirrje për bashkëpunim mes partive politike për të shmangur një krizë qeveritare pas zgjedhjeve, meqë në vlerësimin e tij vendi ka nevojë urgjente për një qeverisje stabile, duke marrë parasysh zhvillimet e fundit ndërkombëtare dhe rajonale.

“Rreth Kosovës janë duke ndodhur zhvillime të mëdha, bota po ndryshon më të madhe. Më shumë se kurrë Kosova ka nevojë me pas qeverisje. Po e shihini administratën e re në Amerikë, po e shihni çka po ndodh në Ukrainë. Kjo dinamikë rajonale, botërore, aleatët tanë sot janë në një situatë të rëndë”, ka shtuar ai.

Ai ka përsëritur se për tema nacionale është i gatshëm të ndihmojë çdo kryeministri, përfshirë edhe Albin Kurtin.

“Unë jam i gatshëm të ndihmojë kryeministrit tim që i shërben vendit”.