Kina vendos tarifa 34% për mallrat amerikane

Pekini ka njoftuar masa hakmarrëse ndaj tarifave të reja të vendosura nga administrata e presidentit amerikan Donald Trump, duke rritur tarifat për mallrat e importuara nga SHBA në 34%. Vendimi hyn në fuqi më 10 prill dhe përfaqëson një përshkallëzim të mëtejshëm të tensioneve tregtare mes dy ekonomive më të mëdha në botë, shkruan DW.

Tarifat e reja të Pekinit vijnë pas njoftimit të Uashingtonit për një tarifë minimale prej 10% mbi të gjitha importet në SHBA, si dhe vendosjen e një tarife specifike prej 34% për mallrat kineze. Kjo shifër, e shtuar me tarifat e mëparshme prej 20%, e çon ngarkesën totale mbi produktet kineze në 54%.

Përveç tarifave, Ministria e Tregtisë në Kinë ka njoftuar masa shtesë për të kufizuar eksportin e materialeve të tokës së rralla, të cilat janë thelbësore për industritë e teknologjisë së lartë, përfshirë prodhimin e çipave dhe baterive për automjetet elektrike. Gjithashtu, janë vendosur kontrolle të eksportit për 27 kompani amerikane, përcjell albinfo.ch.

Si pjesë e reagimit, Pekini ka nisur një padi kundër SHBA-së në Organizatën Botërore të Tregtisë (OBT), duke argumentuar se masat amerikane bien ndesh me rregullat ndërkombëtare.

“Vendosja e të ashtuquajturave ‘tarifa reciproke’ nga Shtetet e Bashkuara shkel seriozisht rregullat e OBT-së, dëmton të drejtat dhe interesat legjitime të anëtarëve të OBT-së dhe minon sistemin shumëpalësh të tregtisë,” thuhet në deklaratën e Ministrisë së Tregtisë së Kinës, shkruan DW.

Zyrtarët kinezë e cilësuan vendimin e Uashingtonit si një “praktikë tipike bullizmi”, duke paralajmëruar për ndikime negative në stabilitetin e rendit ekonomik global.

Ky zhvillim përfaqëson një përshkallëzim të mëtejshëm të tensioneve tregtare mes SHBA-së dhe Kinës, të cilat kanë pasur një histori të gjatë të mosmarrëveshjeve mbi tarifat, eksportet dhe çështjet e pronësisë intelektuale. Ekspertët paralajmërojnë se përshkallëzimi i mëtejshëm mund të ketë pasoja të ndjeshme për tregjet globale dhe zinxhirët e furnizimit, përcjell albinfo.ch.

The post Kina vendos tarifa 34% për mallrat amerikane appeared first on Albinfo.