Kosovë: Prindërve u bëhet thirrje për të vaksinuar fëmijët kundër fruthit

Pasi janë regjistruar disa raste të fruthit në Kosovë, Instituti Kombëtar i Shëndetësisë Publike (IKSHPK) thekson se vaksina mbetet mënyra më e sigurt për parandalimin e kësaj sëmundjeje. IKSHPK ka bërë thirrje për vaksinimin e fëmijëve kundër fruthit, shytave dhe rubeolës (vaksina MMR).

Pavarësisht se nga viti 2018 nuk ka pasur raste të fruthit, këtë vit janë regjistruar disa raste të prekura. Nga janari deri tani, janë raportuar pesë raste, dy në janar dhe tre në mars. Faik Hoti nga IKSHPK ka apeluar që prindërit të vaksinojnë fëmijët e tyre me vaksinën MMR, duke theksuar se fruthi është një sëmundje ngjitëse që mund të shkaktojë komplikime serioze te fëmijët, transmeton albinfo.ch.

Nga Qendra e Mjekësisë Familjare nr V në Dardani, thonë se nuk kanë pasur raste të fruthit, por doktoresha Hamide Morina apelon që prindërit të vaksinojnë fëmijët pa hezitim. IKSHPK ka njoftuar se fëmijët që nuk kanë marrë vaksinën sipas kalendarit të rregullt mund të vaksinohen në çdo kohë, duke siguruar që të marrin të dy dozat e vaksinës.

Prindërit inkurajohen të mos vonojnë vaksinimin, pasi ai mbetet mënyra më efikase për të mbrojtur fëmijët nga fruthi.

The post Kosovë: Prindërve u bëhet thirrje për të vaksinuar fëmijët kundër fruthit appeared first on Albinfo.