Kryeministrja Meloni pret Macron në Romë më 3 qershor

Kryeministrja e Italisë, Giorgia Meloni, do të presë presidentin francez Emmanuel Macron për një vizitë zyrtare në Romë më 3 qershor, ka njoftuar zyrtarisht zyra e Kryeministres italiane të mërkurën.

Në një deklaratë të shkurtër për mediat, zyra e Melonit bëri të ditur se “temat kryesore të agjendës dypalëshe, evropiane dhe ndërkombëtare do të jenë në qendër të bisedimeve.” Detaje të tjera mbi temat specifike që do të diskutohen nuk janë bërë publike.

Vizita vjen në një kohë kur marrëdhëniet midis Italisë dhe Francës po shënojnë një periudhë dialogu intensiv, sidomos në kuadër të sfidave të përbashkëta evropiane si migracioni, mbrojtja dhe politika ekonomike.

Takimi pritet të konfirmojë përkushtimin e të dy vendeve për të forcuar bashkëpunimin politik dhe strategjik brenda Bashkimit Evropian dhe përtej tij. / abcnews.al