Merz thotë se Gjermania duhet të ketë ushtrinë më të fortë në Evropë

Kryetari i CDU-së, Friedrich Merz, ka shprehur qëllimin e tij për ta kthyer Gjermaninë në një fuqi të padiskutueshme ushtarake konvencionale në kontinentin evropian. Në një deklaratë të fortë për situatën e sigurisë në Evropë, ai theksoi se lufta e Rusisë kundër Ukrainës është një kërcënim i drejtpërdrejtë për rendin e paqes dhe ligjit ndërkombëtar, shkruan DW, transmeton albinfo.ch.

“Kjo luftë e tmerrshme nuk përcakton vetëm fatin e Ukrainës, por edhe të gjithë Evropës,” u shpreh Merz. “Në rrezik është vetë rendi i paqes në kontinentin tonë – dhe nëse ligji dhe drejtësia do të mbizotërojnë, apo dhuna dhe tirania.”

Merz tha se Gjermania nuk është palë në luftë, por gjithashtu nuk është as një ndërmjetëse neutrale. “Nuk duhet të ketë asnjë dyshim se ku qëndrojmë: pa mëdyshje në anën e Ukrainës”, transmeton albinfo.ch.

Në këtë kontekst, ai premtoi se Bundeswehri (ushtria gjermane) do të forcohet në mënyrë të qëndrueshme, duke u bërë “ushtria më e fortë konvencionale në Evropë”. Plani përfshin investime afatgjata dhe krijimin e një shërbimi të ri kombëtar vullnetar.

“Kjo është ajo që i takon vendit më të populluar dhe ekonomikisht më të fortë në Evropë,” tha Merz, duke shtuar se “miqtë dhe partnerët tanë jo vetëm që e presin këtë nga ne – por po e kërkojnë me forcë”.

Deklaratat e Merzit vijnë në një kohë të tensionuar në politikën evropiane të mbrojtjes, me rritjen e kërkesave për rritje të shpenzimeve ushtarake dhe koordinim më të madh përballë kërcënimeve nga Lindja, transmeton albinfo.ch.

The post Merz thotë se Gjermania duhet të ketë ushtrinë më të fortë në Evropë appeared first on Albinfo.