Meta paralajmëron përdoruesit evropianë: përvoja në rrjetet sociale mund të përkeqësohet

Kompania Meta – që përfshin Facebook, Instagram dhe WhatsApp – ka paralajmëruar se përdoruesit në Evropë mund të përballen me një përvojë më të dobët në rrjetet sociale. Kjo ndodh pasi Bashkimi Evropian vendosi që modeli i ri i kompanisë “prano ose paguaj” nuk është në përputhje me rregullat e reja të Aktit për Tregjet Digjitale (DMA).

Çfarë do të thotë kjo? Përdoruesit duhet të zgjedhin: ose paguajnë për përdorimin e platformave, ose lejojnë që Meta të përdorë të dhënat e tyre për reklama.

Komisioni Evropian e gjobiti Metën me 200 milionë euro dhe tha se ky model nuk u jep përdoruesve mundësinë e vërtetë për të vendosur vetë si të përdoren të dhënat e tyre personale, përcjell albinfo.ch.

Meta pranoi se do të duhet të ndryshojë mënyrën si funksionon ky model dhe paralajmëroi se këto ndryshime mund ta përkeqësojnë përvojën e përdoruesve evropianë dhe të ndikojnë në të ardhurat e saj në këtë rajon.

Ndërkohë, po shqyrtohet edhe një tjetër version i modelit që Meta e kishte propozuar më parë – i cili, sipas tyre, përdor më pak të dhëna personale.

The post Meta paralajmëron përdoruesit evropianë: përvoja në rrjetet sociale mund të përkeqësohet appeared first on Albinfo.