NATO zhvillon stërvitje të madhe gatishmërie në të gjitha shtetet evropiane

Ushtrimi Griffin Lightning 25 i NATO-s përfshin 26,000 trupa, tanke, helikopterë sulmi, spitale, dronë, e parashutistë.

Është një stërvitje shumëkombëshe në të gjithë Poloninë dhe shtetet baltike që teston gatishmërinë e NATO-s për luftë.

Ndërsa forcat ukrainase i japin një goditje tronditëse Rusisë me një sulm të gjerë me dronë në disa baza ajrore ruse, bëhet e ditur se aleatët e NATO-s po testojnë forcën dhe gatishmërinë e aleancës për luftë.

Ushtrimi Griffin Lightning ka vendosur 26,000 trupa shumëkombëshe në të gjithë shtetet e NATO-s në vijën e frontit, përfshirë Poloninë dhe vendet baltike, për të testuar aftësitë dhe gatishmërinë e NATO-s për një sulm të mundshëm nga Rusia brenda muajve ose viteve të ardhshme.

Vetëm në Estoni, pothuajse 18,000 trupa kombëtare udhëheqin operacionin Hedgehog si pjesë e strukturës së përgjithshme Griffin Lightning.

“Kur dëgjon zhurmën e aeroplanëve të NATO-s këtu përreth, mund të jetë e lartë, por ne themi se është zhurma e lirisë”, tha nënkoloneli Koosa, nga Forcat Mbrojtëse të Estonisë.

“Kur shkova në shkollë, dëgjuam zhurmën e aeroplanëve sovjetikë, kishte fotografi të Leninit, ne paguanim me rubla, pa pasur asgjë për të blerë nga dyqanet”, kujtoi ai.

“Tani që jemi në NATO, mund të sigurohemi që asgjë e tillë të mos kthehet kurrë.”

Stërvitja po zhvillohet në një kontekst shumë më të pasigurt gjeopolitik, me shefin e Mbrojtjes së Gjermanisë që thotë se NATO duhet të përgatitet për një luftë të mundshme me Rusinë brenda viteve të ardhshme.