Nga Prishtina në Berlin: Agona Shporta prezanton “ Hape Portën ” në koncertin e Kino Kosova Film Festival në Bernë

Vokaliste dhe aranzhuese Agona Shporta sjell albumin e saj debutues Hape Portën (2024), një rikrijim i guximshëm i muzikës popullore shqiptare të ndërthurur me tinguj bashkëkohorë dhe frymë improvizimi. Me zërin e saj evokues dhe qasjen e veçantë, Shporta lidh traditën me modernitetin, duke ofruar një përvojë muzikore të thellë dhe prekëse.

Asaj i bashkohen muzikantë të shquar nga Kosova: kitaristja Tringa Sadiku, pianisti Ilir Bajri, basisti Enver Muhamedi dhe bateristi Enes Beu. Së bashku krijojnë një peizazh tingujsh të rrënjosur në trashëgimi, por të mbushur me horizonte të reja.

Titulli i albumit Hape Portën është frymëzuar nga kënga “Hape Portën Moj Evropë”, një iso-polifoni e Jugut të Shqipërisë nga vitet ’90, që pasqyronte migrimet masive pas rënies së komunizmit. Në versionin e Shportës, kënga rinterpretohet në kontekstin e liberalizimit të vizave për Kosovën në vitin 2024, duke e zhvendosur fokusin nga vështirësitë e së kaluarës drejt një të ardhmeje më shpresëdhënëse.

Repertuari i saj përfshin gjithashtu përpunime të këngëve klasikëve të Nexhmije Pagarushës dhe vënien në muzikë të poezisë së Xhevdet Bajrajt, duke ndërthurur temat e dashurisë dhe emocioneve njerëzore. Muzika e saj nderon të kaluarën ndërsa hap horizonte të reja për tingullin shqiptar.

Koncerti në Bernë

Agona Shporta dhe ansambli i saj do të prezantojnë Hape Portën live në Kino Kosova Film Festival, më 13 Shtator, në Turnhalle/PROGR, Bernë.

Biletat janë të disponueshme në

Rreth Artistëve

Agona Shporta (Prizren, 1994) ka studiuar për performancë vokale në The New School for Jazz and Contemporary Music në Nju Jork dhe aktualisht ndjek Master në Creative Production në Berlin. Stili i saj ndërthur xhazin, muzikën klasike indiane dhe folklorin shqiptar, duke krijuar tekstura vokale dhe harmoni unike. Hape Portën është publikimi i saj i parë i plotë.

Tringa Sadiku (Mitrovicë, 1999) është një nga talentet më premtuese të kitarës në Kosovë, e trajnuar në Mitrovicë, Prishtinë dhe aktualisht në Graz, Austri. Ka performuar në festivale ndërkombëtare dhe njihet për teknikën dhe shprehjen e saj të rafinuar.

Ilir Bajri (Pejë, 1969) është pianist, kompozitor dhe figurë qendrore e skenës kulturore në Prishtinë. Themelues i Prishtina Jazz Festival, ai ka kontribuar në zhvillimin e xhazit në Kosovë dhe ka performuar ndërkombëtarisht me kompozime të njohura në xhaz, muzikë klasike dhe film.

Enver Muhamedi (Kosovë, 1994) është basist me karrierë që shtrihet nga muzika klasike tek xhazi dhe rock-u. Ka performuar në Evropë dhe ka publikuar albumin e tij debutues Letter to K (2020), të dedikuar Kosovës.

Enes Beu është multi-instrumentalist, kompozitor dhe baterist i njohur, i cili filloi në skenën alternative të Prishtinës para se të bëhej një prej bateristëve më të kërkuar të xhazit në Kosovë. Albumi i tij Between Wind and Waves (2020) dëshmon për shumëllojshmërinë e tij artistike.

Me Hape Portën, Agona Shporta dhe bashkëpunëtorët e saj hapin një kapitull të ri në evolucionin e muzikës shqiptare. Një kapitull që nderon historinë, duke festuar lirinë, krijimtarinë dhe premtimin e së nesërmes.

Lexoni po ashtu:

Kino Kosova 2025 vjen në shtator në Bernë, Portugalia vend mysafir, tema “Sense of Purpose”

The post Nga Prishtina në Berlin: Agona Shporta prezanton “ Hape Portën ” në koncertin e Kino Kosova Film Festival në Bernë appeared first on Albinfo.