OBSh deklarohet për virusin HMPV, thotë se s’është i ri e as i rrezikshëm

Virusi, që po përhapet në Kinë, nuk është as i ri dhe as veçanërisht i rrezikshëm, tha sot Organizata Botërore e Shëndetësisë (OBSH) duke iu referuar një infeksion respirator HMPV.

“Infeksione të ndryshme të frymëmarrjes po qarkullojnë në Kinë, tipike gjatë dimrit – duke përfshirë gripin, RSV, Covid-19 dhe HMPV”, tha një zëdhënëse e OBSH-së.

Mediet kineze në fillim të dhjetorit raportuan se rastet e metapneumovirusit njerëzor (HMPV) ishin në rritje, duke ngritur shqetësime për shëndetin global – pesë vjet pas shpërthimit të pandemisë së Covid-19 në Kinë.

Por, si Pekini ashtu edhe OBSH-ja janë përpjekur të zbusin shqetësimet ditët e fundit.

“HMPV po tërheq shumë interes pasi nuk është një emër i njohur, por u zbulua në vitin 2001”, tha zëdhënësja e OBSH-së Margaret Harris, në Gjenevë.

“HMPV është një virus i zakonshëm që qarkullon në dimër dhe pranverë”, shtoi ajo.

“Nivelet e raportuara të infeksioneve të frymëmarrjes në Kinë, janë brenda kufijve të zakonshëm për sezonin e dimrit”, tha Harris.

The post OBSh deklarohet për virusin HMPV, thotë se s’është i ri e as i rrezikshëm appeared first on Albinfo.