Përshkallëzimi i tensioneve në Kashmir/ Pakistani pretendon se ka vrarë 50 ushtarë indianë

Ministri i Informacionit i Pakistanit, Attaullah Tarar, ka deklaruar se forcat pakistaneze kanë goditur instalacione ushtarake indiane përgjatë kufirit të diskutueshëm në Kashmir dhe kanë vrarë 40 deri në 50 ushtarë indianë.

“Ne kemi shkatërruar instalacionet e tyre ushtarake në kufirin de facto,” tha Tarar gjatë një deklarate për mediat, duke iu referuar Linjës së Kontrollit (LoC) që ndan zonat e kontrolluara nga India dhe Pakistani në rajonin e kontestuar.

Deklarata vjen pas dy ditësh përleshjesh intensive dhe bombardimesh të ndërsjella në zonën kufitare. Gazetari i BBC në Indi, Neville Lazarus, raportoi për “bombardime shumë të rënda” në të dy anët e kufirit.

Në një intervistë për emisionin ndërkombëtar The World with Yalda Hakim, Tarar akuzoi Indinë për agresion dhe paralajmëroi se “Pakistani do të përgjigjet me vendosmëri.”

Situata në rajon po shihet me shqetësim nga komuniteti ndërkombëtar, për shkak të rrezikut që përshkallëzimi ushtarak mes dy fuqive bërthamore mund të kthehet në konflikt të hapur.

/ abcnews.al