Spanjollët Vizitojnë Universitetin e Prishtinës për Bashkëpunim Akademik
Universiteti i Prishtinës ka organizuar një takim zyrtar me profesorë nga Universiteti Autonom i Madridit, në kuadër të forcimit të bashkëpunimit ndërkombëtar dhe zhvillimit të projekteve akademike të përbashkëta. Prorektorja për ndërkombëtarizim dhe shkëmbim akademik, prof. Rozafa Basha, mirëpriti prof. Concepción Camarero Bullón, shefe e Departamentit të Gjeografisë, si dhe prof. Miguel Borja Bernabé Crespo, delegat për ndërkombëtarizim i këtij universiteti spanjoll. Gjatë takimit, u theksua bashkëpunimi i vazhdueshëm ndërmjet prof. Miguel Borja Bernabé Crespo dhe prof. Arsim Ejupi nga Departamenti i Gjeografisë në Fakultetin e Shkencave Matematike-Natyrore të Universitetit të Prishtinës. Të dy profesorët diskutuan për projektet e përbashkëta kërkimore në fushën e gjeografisë politike dhe vlerësuan progresin e arritur deri më tani. Prorektorja Basha vlerësoi bashkëpunimin ekzistues ndërmjet Universitetit të Prishtinës dhe Universitetit Autonom të Madridit, i cili tashmë është zhvilluar në disa nivele akademike. Ajo veçoi Fakultetin e Ekonomisë dhe Departamentin e Punës Sociale në Fakultetin Filozofik, ku aktualisht po zbatohen marrëveshjet Erasmus+ KA171 për mobilitetin e studentëve dhe stafit akademik. Takimi gjithashtu prezantoi programet ndërkombëtare të Universitetit të Prishtinës dhe diskutoi mundësi konkrete për thellimin e bashkëpunimit përmes projekteve të reja kërkimore, zgjerimit të marrëveshjeve të shkëmbimit në departamente të tjera, si dhe zhvillimin e programeve të përbashkëta të studimit. Një nga temat e diskutimit ishte mundësia e angazhimit të një ligjëruesi të gjuhës spanjolle në Fakultetin e Filologjisë dhe në Qendrën e Gjuhëve. Përfaqësuesit e universitetit spanjoll shprehën gatishmëri për të zgjeruar bashkëpunimin me Universitetin e Prishtinës, duke theksuar interesin e tyre për forcimin e lidhjeve me rajonin e Ballkanit Perëndimor, përfshirë Kosovën. Në kuadër të vizitës, profesorët spanjollë, të ftuar nga Departamenti i Gjeografisë, mbajtën një ligjëratë për studentët dhe stafin akademik më 22 prill, duke u fokusuar në gjeografinë historike dhe politike. Më 23 prill, ata realizuan një vizitë hulumtuese në rajonet e Gorës dhe Opojës, së bashku me profesorë të Universitetit të Prishtinës, si pjesë e një studimi të përbashkët. Njoftimi i plotë: https://www.facebook.com/share/p/1DRzd7oGW6/ Burimi i lajmit: Shënim:
