Qetësi në qytetet ukrainase pas nisjes së armëpushimit treditor nga Rusia

Qytetet ukrainase kanë përjetuar qetësi në orët e para të armëpushimit treditor të shpallur nga Rusia, ndonëse Ukraina raportoi dy sulme me bomba të telekomanduara në rajonin e Sumi-t pas hyrjes në fuqi të marrëveshjes. Nuk raportohen viktima.

Kremlini shpalli armëpushimin me rastin e 80-vjetorit të fitores ndaj Gjermanisë naziste dhe në prag të festimeve të 9 majit në Moskë, ku pritet edhe një paradë ushtarake në Sheshin e Kuq. Ndër të ftuarit janë presidenti kinez Xi Jinping, kryeministri sllovak Robert Fico dhe presidenti serb Aleksandar Vuçiç.

Ukraina nuk e ka pranuar armëpushimin, duke e cilësuar një manovër propagandistike. Presidenti Zelensky tha se gjatë natës vendi përjetoi sulme me raketa dhe mbi 140 dronë kamikazë, me viktima dhe të plagosur.

Kievi mbetet i përkushtuar ndaj propozimit amerikan për një armëpushim 30-ditor, ndërsa SHBA-të po përpiqen të rikthejnë palët në tryezën e bisedimeve. /abcnews.al