Qindra ish-zyrtarë izraelitë i bëjnë thirrje Trump-it për t’i dhënë fund luftës në Gaza

Rreth 600 ish-zyrtarë të lartë të sigurisë në Izrael, përfshirë ish-drejtorë të shërbimeve inteligjente si Mossad dhe Shin Bet, i kanë dërguar një letër presidentit amerikan Donald Trump, duke i kërkuar që të ushtrojë presion mbi qeverinë izraelite për t’i dhënë fund menjëherë luftës në Gaza.

Në letër thuhet:

“Është vlerësimi ynë profesional se Hamasi nuk përbën më një kërcënim strategjik për Izraelin.”

Ata theksojnë se besueshmëria e Trump tek shumica e popullit izraelit e bën atë të aftë të ndikojë te kryeministri Benjamin Netanyahu për të ndalur luftën, për të kthyer pengjet dhe për të ndaluar vuajtjet në Gaza.

Apeli i tyre vjen në një kohë kur Netanyahu thuhet se po kërkon zgjerimin e operacioneve ushtarake, ndërsa bisedimet indirekte me Hamasin për një armëpushim kanë ngecur.

Lufta në Gaza nisi pas sulmit të 7 tetorit 2023 nga Hamasi në jug të Izraelit, ku u vranë rreth 1,200 persona dhe 251 u morën peng. Që atëherë, mbi 60,000 njerëz janë vrarë në Gaza, sipas Ministrisë së Shëndetësisë së drejtuar nga Hamasi.

Po ashtu, në Gaza po zhvillohet një krizë e thellë humanitare për shkak të kufizimeve të ashpra në ndihmat dhe mallrat që lejohen të hyjnë. Ministria raporton se 180 persona, përfshirë 93 fëmijë, kanë vdekur nga uria që nga fillimi i konfliktit.

Agjencitë e OKB-së kanë paralajmëruar se “skenari më i keq i urisë po realizohet”.

Letra drejtuar Trump-it është nënshkruar nga figura të rëndësishme si ish-shefi i Mossad-it Tamir Pardo, ish-drejtori i Shin Bet-it Ami Ayalon, ish-kryeministri Ehud Barak dhe ish-ministri i Mbrojtjes Moshe Yaalon.

Ish-zyrtarët janë pjesë e grupit Commanders for Israel’s Security (CIS), organizata më e madhe e ish-gjeneralëve dhe zyrtarëve të lartë të sigurisë në Izrael, e cila prej kohësh kërkon që qeveria të përqendrohet në lirimin e pengjeve dhe një zgjidhje politike për konfliktin.