Raporti që nxjerr në pah gjendjen alarmante në burgjet e Maqedonisë së Veriut

Kushtet në institucionet ndëshkuese-korrektuese në Maqedoninë e Veriut vazhdojnë të jenë të mjerueshme, thuhet në raportin e fundit të Entit Shtetëror të Revizionit (ESHR). Mbingarkesa nëpër qeli, mungesa e kushteve higjienike, lagështira, mungesa e stafit mjekësor dhe investimet e pamjaftueshme në infrastrukturë janë disa prej çështjeve më të theksuara që ngre raporti.

Situata më alarmante vërehet në Burgun e Idrizovës – institucioni më i madh ndëshkues në vend – ku mbipopullimi dhe gjendja e rënduar e objekteve përbëjnë problemin kryesor. Megjithatë, gjendja nuk është më e mirë as në burgjet e tjera të vendit, përcjell albinfo.ch.

“Reparti i pranimit dhe ambulanca në Idrizovë janë në kushte më se të papranueshme: qeli me vrima, mure të ndotura dhe të dëmtuara, mbeturina dhe dyshekë të papastër,” thekson raporti. Ndërkohë, në Burgun e Shkupit, të paraburgosurit detyrohen të konsumojnë ushqim dhe të kryejnë nevojat elementare fiziologjike në të njëjtat hapësira. Në Burgun e Kumanovës, problemi kryesor lidhet me mungesën e ujit të pijshëm – një e drejtë themelore për çdo individ.

Përveç kushteve të rënda fizike, sistemi përballet edhe me mungesë të theksuar të stafit mjekësor dhe të policisë së burgjeve.

“Nuk ka kujdes të plotë shëndetësor për personat e privuar nga liria për shkak të mungesës së personelit mjekësor. Numri i pamjaftueshëm i oficerëve të policisë ka çuar në rritjen e kostove për orët shtesë, ndërsa paditë e paraqitura nga vetë punonjësit për punë jashtë orarit dhe për kompensime të tjera kanë shkaktuar rritje të konsiderueshme të shpenzimeve gjyqësore,” thekson Enti.

Financat e pamjaftueshme dhe mungesa e veprimeve konkrete nga institucionet përkatëse kanë penguar përmirësimin e situatës. Në përfundimet e raportit, theksohet se masat aktuale nuk janë të mjaftueshme për të adresuar problemet sistemike. Për këtë qëllim, ESHR ka propozuar një paketë prej 26 masash, të cilat kërkojnë zbatim urgjent, kryesisht nga ana e Drejtorisë për Ekzekutimin e Sanksioneve.

The post Raporti që nxjerr në pah gjendjen alarmante në burgjet e Maqedonisë së Veriut appeared first on Albinfo.