Raundi i dytë i bisedimeve SHBA-Iran për armët bërthamore do të mbahet më 19 prill

Raundi i dytë i bisedimeve midis negociatorëve iranianë dhe amerikanë për armët bërthamore do të mbahet të shtunën e ardhshme në Oman, tha për mediat shtetërore ministri i Jashtëm iranian Abbas Araghchi, duke shtuar se takimi i sotëm “u afrua shumë” me arritjen e një kuadri për negociatat.

“Atmosfera në takimin e sotëm ishte e tillë që siguroi vazhdimësi dhe përparim,” tha Araghchi për transmetuesin shtetëror IRIB.

“Nëse ne mund të finalizojmë bazën (bisedimet) në seancën e ardhshme, unë besoj se do të kemi bërë përparim të rëndësishëm.”, shtoi ai.

Ai tha se të dyja palët thanë se po kërkojnë një marrëveshje në kohën më të shkurtër të mundshme.

Araghchi u pyet për takimin e tij të shkurtër me të dërguarin e presidentit amerikan Donald Trump për Lindjen e Mesme, Steve Witkoff, i cili ishte kontakti i parë i drejtpërdrejtë midis zyrtarëve amerikanë dhe iranianë gjatë mandatit të dytë të Trump.

“Kur të dyja palët po largoheshin, ne kaluam disa minuta duke biseduar”, tha ministri i jashtëm. “Kjo është një normë e pranuar. Ne gjithmonë i përmbahemi normave diplomatike kur kemi të bëjmë me diplomatë amerikanë dhe këtë herë kemi shkëmbyer gjithashtu të njëjtin nivel kënaqësish.”/abcnews.al