Rregullorja e re e Eurovision 2025 ua ndalon artistëve të mbajnë flamuj LGBTQ+ në skenë

Një rregullore e re për Eurovisionin 2025 ka ndezur debat të ashpër për kufizimet që ajo vendos mbi simbolikat e komunitetit LGBTQ+. Sipas dokumenteve të publikuara nga organizatorët, artistëve pjesëmarrës nuk do t’u lejohet të mbajnë asnjë flamur përveç atij kombëtar – një ndalim që përfshin drejtpërdrejt edhe flamurin e krenarisë LGBTQ+.

Rregullorja, hartuar nga transmetuesi publik zviceran SRG SSR në bashkëpunim me EBU-në (European Broadcasting Union), zbatohet në të gjitha hapësirat zyrtare të eventit, përfshirë skenën, Dhomën e Gjelbër dhe Ceremoninë e Hapjes. Ky vendim, që vjen nën pretekstin e “qartësisë për audiencën”, po kritikohet si një formë censure që godet drejtpërdrejt artistët queer dhe përkrahësit e të drejtave të njeriut.

Vitin e kaluar, Nemo, deklaroi se i ishte ndaluar të ngrejë flamurin që përfaqësonte identitetin e tij gjinor. “Më është dashur ta fus fshehurazi sepse Eurovision tha ‘jo’. Dhe unë e bëra gjithsesi,” tha ai.

Këtë vit, të njëjtin kufizim do ta përjetojnë artistë si Miriana Conte (Malta), duoja austriake JJ, dhe Erika Vikman nga Finlanda, të njohur për përfshirjen e tyre në komunitetin LGBTQ+.

Rregullorja gjithashtu ndalon flamuj të tjerë që nuk janë kombëtarë, duke përfshirë ato të vendeve të tjera në shenjë solidariteti. Në këtë kontekst, flamuri ukrainas, i shfaqur nga artistë të ndryshëm vitet e fundit, nuk do të lejohet në skenë – një vendim që ngre pikëpyetje mbi standardet e dyfishta dhe mungesën e qëndrueshmërisë morale nga organizatorët, transmeton albinfo.ch.

Zëdhënës të konkursit theksojnë se politika është “në përputhje me evenimente të tjera ndërkombëtare”. Megjithatë, brenda rretheve të të drejtave të njeriut, kjo konsiderohet si një hap prapa në përfaqësimin dhe përfshirjen në një platformë që prej dekadash është parë si strehë për artistë LGBTQ+.

Paradoksalisht, ndërkohë që rregullat për artistët janë forcuar, spektatorëve do t’u lejohet të mbajnë një sërë flamujsh dhe banderolash jashtë skenës – për sa kohë ato nuk bien ndesh me ligjet e Zvicrës. Kjo lëvizje është parë si përpjekje për të shmangur kritikat ndërkombëtare, por në thelb nuk e zgjidh çështjen e lirisë së shprehjes në një nga eventet më të ndjekura kulturore në botë.

Ironikisht, edhe pse flamuri palestinez ishte ndaluar në Eurovision 2024, ai do të jetë i lejuar në arenën e Bazelit këtë vit – duke reflektuar një qasje të pasigurt dhe kontradiktore nga ana e organizatorëve për sa i përket simbolikës politike.

Eurovision 2025 pritet të zhvillohet më 13, 15 dhe 17 maj në Bazel. Por atmosfera e ngjarjes tashmë është turbulluar nga akuza për censurë, përjashtim dhe mungesë të qartë pozicionimi mbi të drejtat themelore.

The post Rregullorja e re e Eurovision 2025 ua ndalon artistëve të mbajnë flamuj LGBTQ+ në skenë appeared first on Albinfo.