Sekretari i Mbrojtjes: SHBA synon zgjidhje diplomatike për paqe të qëndrueshme në Ukrainë

Në fund të vizitës së tij në NATO, Sekretari amerikan i Mbrojtjes, Pete Hegseth tha se Shtetet e Bashkuara synojnë një zgjidhje diplomatike e paqësore të luftës në Ukrainë, që mundëson një paqe të qëndrueshme.

Në një konferencë shtypi në selinë e NATO-s në Bruksel, Sekretari Hegseth hodhi poshtë kritikat ndaj strategjisë negociuese të Uashingtonit me Rusinë mbi luftën në Ukrainë dhe paralajmëroi Evropën që të mos i shfrytëzojnë Shtetet e Bashkuara duke i bërë përgjegjëse për mbrojtjen e saj.

Ai tha se aleatët evropian duhet të marrin përgjegjësinë kryesore për mbrojtjen e Evropës.

Zoti Hegseth po ashtu mbrojti komentet e bëra një ditë më parë rreth kufijve të Ukrainës, duke thënë se ato nuk janë lëshime ndaj Rusisë, por vetëm njohje e realitetit në terren.

Një ditë më herët, Sekretari Hegseth tha se anëtarësimi i Ukrainës në NATO nuk është realist dhe sugjeroi se Kievi duhet të hiqte dorë nga shpresat se do t’i kthejë të gjithë territorin e saj nga Rusia dhe se në vend të kësaj duhet të përgatitet për një marrëveshje paqeje të negociuar, zbatimi i së cilës do të mbështetet nga forcat ndërkombëtare.

Sekretari Hegseth po ashtu deklaroi se është e drejtë të thuhet se fondet për Ukrainën në të ardhmen do të jenë pjesë e negociatave.