SHBA pezullon financimet e ndihmave/ UNAIDS paralajmëron 2.000 raste të reja me HIV

Pezullimi i financimit të ndihmës nga SHBA ka krijuar një situatë të rrezikshme për luftën kundër HIV/SIDA-së në nivel global. Agjencia e Kombeve të Bashkuara për HIV/AIDS (UNAIDS) ka paralajmëruar se mund të ndodhin 2,000 infeksione të reja me HIV çdo ditë dhe një rritje dhjetëfish e vdekjeve të lidhura me SIDA-n në katër vitet e ardhshme, nëse financimi i SHBA-së nuk rifillohet ose zëvendësohet nga një burim tjetër.

Ky pezullim ka pasur një ndikim të drejtpërdrejtë në shërbimet shëndetësore për personat që jetojnë me HIV/SIDA, duke çuar në mbylljen e shumë klinikave dhe pushimin nga puna të mijëra punonjësve shëndetësorë. Drejtoresha ekzekutive e UNAIDS, Ëinnie Byanyima, theksoi se tërheqja e papritur e financimit nga SHBA ka pasur pasoja shkatërruese për shërbimet dhe mund të çojë në rritjen e infeksioneve dhe vdekjeve nga SIDA.

Në vitin 2023, janë regjistruar 600,000 vdekje të lidhura me SIDA-n globalisht. Byanyima theksoi se nëse financimi i SHBA-së nga Agjencia Amerikane për Zhvillim Ndërkombëtar (USAID) nuk rifillon në prill, kjo mund të çojë në 6.3 milionë vdekje shtesë nga SIDA në katër vitet e ardhshme.

Administrata Trump ka justifikuar pezullimin e ndihmës me politikën “America First”, duke theksuar se ishte një masë për të siguruar që financimet të ishin në përputhje me interesat amerikane. Megjithatë, shumë kanë ngritur shqetësime për pasojat e këtij pezullimi, pasi ndihma amerikane për HIV dhe SIDA ka mbështetur një pjesë të madhe të shërbimeve globale.

Në vitin 2023, SHBA kontribuoi me 50 milionë dollarë për UNAIDS, që përfaqësonte 35% të buxhetit të agjencisë. Pezullimi i financimit mund të dëmtojë rëndë përpjekjet globale për parandalimin dhe trajtimin e HIV/SIDA-s.

/ abcnews.al