Sulmet izraelite nuk ndalen në Gaza, mbi 250 të vrarë që nga e enjtja

Të paktën 93 persona janë vrarë nga sulmet ajrore izraelite në disa zona të Rripit të Gazës gjatë 24 orëve të fundit, sipas burimeve mjekësore lokale. Sulmet më të rënda janë regjistruar në Beit Lahia dhe kampin e refugjatëve Jabalia në veri të Gazës.

66 trupa janë transportuar në Spitalin Indonezian, ndërsa 16 të tjera në Spitalin Nasser në jug, pas bombardimeve gjatë natës në Khan Younis dhe në periferi të Deir al-Balah.

Sipas autoriteteve shëndetësore lokale, kjo e çon numrin e përgjithshëm të të vrarëve që nga mëngjesi i së enjtes në mbi 250 persona.

Izraeli ka deklaruar se gjatë ditëve të fundit ka goditur mbi 150 objektiva ushtarake në të gjithë Gazën. Paraprakisht, forcat izraelite kishin shpërndarë fletushka në Beit Lahia, duke u bërë thirrje banorëve të largoheshin nga zona për shkak të operacioneve ushtarake të pritshme.

Ndërkohë, këtë javë Izraeli deklaroi se kishte bombarduar Spitalin Europian në jug të Gazës, duke pretenduar se nën ndërtesë ndodhej një bazë e nëndheshme e Hamasit. Megjithatë, analiza e ekspertëve ndërkombëtarë ka hedhur dyshime të mëdha mbi provat e paraqitura nga Izraeli për justifikimin e këtij sulmi.

Sulmet kanë shkaktuar indinjatë ndërkombëtare dhe shqetësim në rritje për përkeqësimin e situatës humanitare në rajon, ndërsa bisedimet për një armëpushim mbeten të bllokuara.