Talentja nga Kosova, Anda Skeja merr doktoraturën pa Master në Zvicër

Në moshën 27-vjeçare, matematicienja e talentuar nga Kosova, Anda Skeja, ka arritur një sukses të jashtëzakonshëm duke përfunduar doktoraturën në Institutin Federal Zviceran të Teknologjisë në Lozanë (EPFL) pa ndjekur një program Master. Ky është një rast i rrallë, i cili konfirmon aftësitë e saj të jashtëzakonshme në fushën e matematikës.

Skeja e kishte të qartë rrugën e saj akademike që në moshë të vogël. Thotë se gjithmonë e dinte se do bëhej shkencëtare. “Gjithmonë e kam ditur se doja të bëhesha shkencëtare,” thotë ajo për gazetën 20 Minuten. Dashuria për matematikën nisi që kur i ati, profesor universiteti, i jepte enigma matematikore për të zgjidhur si fëmijë. Në moshën 17-vjeçare, ajo kalonte kohën e lirë duke zgjidhur probleme të nivelit universitar, një tregues i qartë i talentit të saj të jashtëzakonshëm.

Pas diplomimit në Universitetin Teknik të Stambollit me një diplomë të dyfishtë në matematikë dhe ekonomi, Skeja e dinte se dëshironte të vazhdonte një karrierë akademike. Në vend që të ndiqte një Master, ajo vendosi të aplikonte direkt për doktoraturë, duke e parë këtë si një mundësi për t’u angazhuar menjëherë në kërkime të avancuara, përcjell albinfo.ch.

EPFL, një nga institucionet më prestigjioze në botë për matematikë dhe shkencat inxhinierike, ishte zgjedhja e saj e vetme. Aplikimi i vetëm që ajo bëri rezultoi i suksesshëm dhe ajo jo vetëm që u pranua, por fitoi edhe Bursën e Ekselencës së Qeverisë Zvicerane, e cila jo vetëm e mbështeti financiarisht, por i dha mundësinë të lidhej me shkencëtarë të tjerë të talentuar.

EPFL konfirmoi se në raste të veçanta, studentë me talent të jashtëzakonshëm mund të pranohen direkt në programin e doktoraturës me një diplomë bachelor katër ose pesëvjeçare, duke përmbushur disa kërkesa shtesë gjatë vitit të parë të studimeve.

Aktualisht, Anda Skeja është studente postdoktorale në Universitetin e Uppsala-s në Suedi, ku fokusi i saj kryesor është kërkimi shkencor. Megjithatë, ajo është rikthyer përkohësisht në EPFL për një qëndrim kërkimor dy mujor. Me lidhje të forta profesionale dhe personale me Zvicrën – ku bashkëshorti i saj po përfundon qëndrimin në Inselspital në Bernë – ajo shpreson të vendoset përgjithmonë në këtë vend, shkruan 20 Minuten.

Përveç angazhimit të saj në kërkime, Skeja synon të frymëzojë më shumë vajza dhe gra të ndjekin matematikën, një fushë që ende shihet si shumë abstrakte dhe sfiduese. “Matematika është e bukur dhe një mjet i fuqishëm për të kuptuar më mirë botën,” thotë ajo, duke theksuar përkushtimin e saj si mentore për studentët e rinj.

Me një rrugëtim akademik unik dhe një pasion të palëkundur për matematikën, Anda Skeja është një shembull frymëzues për të rinjtë dhe për komunitetin shkencor ndërkombëtar.

The post Talentja nga Kosova, Anda Skeja merr doktoraturën pa Master në Zvicër appeared first on Albinfo.