Tarifat, shuplaka e parë për Trump/ Senati miraton nismën e demokratëve kundër tarifave me Kanadanë

Vetëm disa orë pasi Donald Trump shpalli vendosjen e tarifave të reja mbi importet në SHBA, Senati amerikan miratoi me një diferencë të ngushtë votash një projektligj që synon t’i japë fund këtyre masave për Kanadanë.

Me 51 vota pro dhe 48 kundër, Senati i dha dritën jeshile ligjit, i cili tani kalon për shqyrtim në Dhomën e Përfaqësuesve. Kjo përbën një goditje për Trumpin, pasi katër senatorë republikanë u rreshtuan krah demokratëve për ta avancuar këtë nismë.

Projektligji, i propozuar nga demokratët, kërkon të shfuqizojë emergjencën kombëtare të shpallur nga presidenti më 22 janar, e cila ishte lidhur me importin e paligjshëm të fentanylit nga Meksika, Kanadaja dhe Kina. Trump e përdori këtë emergjencë si bazë për të vendosur tarifa të reja mbi Kanadanë.

Republikani John Thune, lideri i shumicës në Senat, kishte bërë thirrje për votim kundër projektligjit, duke paralajmëruar se heqja e tarifave ndaj Kanadasë mund të ndikonte në përhapjen e trafikut të drogës nga veriu. “A do të ndryshojnë kartelet taktikat dhe të shtrijnë aktivitetin e tyre në veri? Mendoj se përgjigja është po,” u shpreh ai.

Megjithatë, katër republikanë dolën kundër linjës së partisë. Një prej tyre, senatorja Susan Collins, argumentoi se tarifat e propozuara do të dëmtonin sektorë të rëndësishëm ekonomikë në shtetin e saj të lindjes, Maine, veçanërisht industrinë e prodhimit të letrës, e cila varet nga lënda e parë kanadeze. Te tjerë  senator qe votuan pro heqjes së tarifave për Kanadanë ishin Lisa Murkowski nga Alaska dhe dy senator nga Kentaki, ish udhëheqësi I Shumicës Mitch Mc Connel dhe Rand Paul./abcnews.al