“Zgjidhja ekziston”, “duhet veç vullnet politik”: Ndërmarrja e këtyre masave e shmang shtrenjtimin e rrymës

Propozimi për shtrenjtimin e energjisë elektrike është kundërshtuar fuqishëm nga qytetarët, shoqëria civile dhe institucione të caktuara. Një që e tillë po shihet i panevojshme dhe në dëm të qytetarëve.

Individë të ndryshëm, OJQ dhe institucione të caktuara kanë dorëzuar komentet e tyre në ZRRE, ku kanë treguar se si mund të shmanget rritja e tarifave.

Në këto komente, në detaje, tregohen masat që duhet të ndërmerren nga operatorët energjetikë në mënyrë që t`i kursehen qytetarët nga ngritja e serishme çmimit të energjisë elektrike.

Analisti Shenoll Muharremi, i cili ka dërguar disa faqe me komente në ZRRE, ka bërë me dje se zgjidhja për mosshtrenjtimin e rrymës ekziston.

Në profilin e tij në “Facebook”, ai ka shkruar se për këtë çështje duhet vetëm pak vullnet politik.

“Rritja e tarifave nuk është e domosdoshme! Për mos me u rritë çmimi i rrymës, ka zgjidhje të lehtë dhe praktike.. veç duhet vullnet dhe me e dashtë këtë vend pak ma shumë. Qysh e kemi thanë prej fillimit, nuk mjafton me qenë kundër apo me kritiku, duhet edhe me ofru zgjidhje. Dhe këtu e kemi ofru zgjidhjen, në mënyrë të detajume, reale dhe të mundshme.. pa e dëmtu as qytetarin, as bizneset, as shtetin”, ka shkruar, duke treguar hapat që e ndalin shtrenjtimin e rrymës.

“1. Reduktim i humbjeve të lejuara të KEDS, në nivelin e vitit të kaluar: €65.37M (Nga €86.54 ne €65.37). -> Nuk ka arsye me i leju më shumë humbje kur as importi nuk është rritë. 2. Shërbimet ndihmëse të KOSTT, rishikim i investimeve jo-urgjente (Nga €43.12 ne €21.17) -> Duhet planifikim më racional, e jo me i ngarku qytetarët për çdo investim, sidomos jo projekte që gjenerojnë valë të re të inflacionit. 3. Mbështetje direkte nga Qeveria (€72.2M nga buxheti)->Kujtojmë, në prag të zgjedhjeve, Qeveria shpërndau mbi €70M për 100 euro për 700,000 qytetarë. Nëse atëherë ka mujt për vota, sot duhet për interes publik”, ka treguar ai.

Muharremi ka vlerësuar se ata që po e propozojnë rritjen e tarifave po e zgjedhin rrugën më të lehtë.

“Pra çmimi i rrymës nuk është se “patjetër duhet me u rritë”. Thjesht mungon vullneti politik për me i përdorë mjetet që ekzistojnë. Ata që kanë me votu pro rritjes, janë duke zgjedhë rrugën më të lehtë, por më të padrejtë, me ja ngarku qytetarit dhe bizneseve faturën. Ata që i marrin këto vendime në emër të publikut duhet me i mbrojtë qytetarët, bizneset, dhe ekonominë tonë. Kjo është tepër e domosdoshme për me ruajt stabilitetin ekonomik dhe me shmang një valë të re të papërballueshme të inflacionit apo rritjes së çmimeve përsëri”, ka shkruar ai.

Edhe Presidenca e Republikës së Kosovës e ka kundërshtuar propozimin për rritjen e çmimit të energjisë elektrike.

Në komentet që ka dërguar në ZRrE, ky institucion ka treguar për masat e menjëhershme që duhet të ndërmerren për të shpjeguar shtrenjtimin e rrymës.

“• Mirëmenaxhimi i shpenzimeve dhe humbjeve: Presidenca vlerëson se të hyrat e lejuara për KEDS-in kanë hapësirë për balancim të mëtejshëm, përderisa niveli i humbjeve do të mund të kufizohej në nivelin e humbjeve të vitit të kaluar (65.37 milionë euro). Kjo ka kuptim, sidomos pasi që sipas parashikimeve aktuale, nuk pritet një rritje e ndjeshme e çmimeve të importit gjatë vitit 2025. Për më tepër, duke pasur parasysh se disa kalkulime dhe kosto të planifikuara nuk janë paraqitur në mënyrë transparente, Presidenca konsideron se ka hapësirë për një rishikim të tyre, duke kontribuar kështu në reduktimin e humbjeve të projektuara”, ka vlerësuar Presidenca.

Më pas, ky institucion ka përmendur subvencionimi i energjisë.

“ZRrE-ja duhet të insistojë për një dialog me Qeverinë për ta shqyrtuar mundësinë e subvencionimit të energjisë për konsumatorët, veçanërisht për ata që janë më të prekur nga rritja e çmimeve. Praktika të tilla janë përdorur edhe në vitin 2022 gjatë shqyrtimit të tarifave, ku pjesa e subvencionimit ishte përfshirë në llogaritjen finale të tarifave. Kostoja për Qeverinë do të kishte efekt më të vogël në krahasim me ndikimin e rritjes së çmimit të energjisë elektrike për qytetarët dhe pasojat e saj në rritjen e inflacionit”, është thënë në komentet e Presidencës.

“Identifikimi i masave shtesë për obligimin e pagesës së faturave mujore në katër komunat veriore” është një masë tjetër e propozuar nga Presidenca.

“Duke marrë parasysh se një pjesë e konsiderueshme e humbjeve komerciale vjen si pasojë e faturave të papaguara nga konsumatorët në katër komunat veriore të vendit, inkurajojmë ZRrE-në që, në bashkëpunim me institucionet relevante, të identifikojë masa shtesë që do të obligonin konsumatorët të përmbushin detyrimin e tyre për pagesën e faturave mujore të energjisë elektrike. Masa të tilla do të ishin në përputhje me parimet e sundimit të ligjit, do të lehtësonin barrën financiare për operatorët, si dhe do të ndihmonin në parandalimin e nevojës për rritje të tarifave, siç është rasti aktual” është thënë aty.

Ndër të tjera, Presidenca si masë të menjëhershme ka përmendur edhe largimi ose reduktimi i përkohshëm i TVSH-së për energjinë elektrike.

Paralajmërimi për shtrenjtimin e energjisë është kundërshtuar fuqishëm nga qytetarët, shoqëria civile dhe opozita. Në anën tjetër, Qeveria e Kosovës është pajtuar me shtrenjtimin e energjisë.

Për të kundërshtuar shtrenjtimin e energjisë elektrike për të shtunën është paralajmëruar një protestë.