Zvicra lehtëson sigurimin nga aksidentet për të vetëpunësuarit, përfitojnë rreth 40 mijë persona

Këshilli Federal  i Zvicrës ka miratuar më 26 gusht 2026 ndryshimin e Rregullores për Sigurimin nga Aksidentet (UVV). Rregullat e reja do të hyjnë në fuqi më 1 janar 2027, përcjell albinfo.ch.

Në Zvicër, të gjithë punëmarrësit janë të siguruar detyrimisht nga aksidentet në bazë të Ligjit për Sigurimin nga Aksidentet (UVG). Për personat e vetëpunësuar, ndërkaq, ky sigurim është vullnetar.

Megjithatë, deri më tani ekzistonte një pengesë e rëndësishme: për t’u përfshirë në sigurimin vullnetar kërkoheshin të ardhura prej së paku 66,690 frangash në vit.

Për shkak të këtij pragu, një pjesë e madhe e të vetëpunësuarve nuk mund të siguroheshin sipas UVG-së, pasi të ardhurat e tyre ishin më të ulëta. Sipas autoriteteve federale, kjo prekte veçanërisht profesionet me të ardhura më të ulëta dhe gratë, të cilat shpesh punojnë me orar të pjesshëm.

Pragu ulet në 44,460 franga

Me ndryshimet e miratuara nga Këshilli Federal, pragu do të ulet nga 45 në 30 për qind të shumës maksimale të fitimit të siguruar.

Kjo do të thotë se nga 1 janari 2027 do të mjaftojnë të ardhura vjetore prej 44,460 frangash për të pasur mundësi të lidhet sigurimi vullnetar nga aksidentet.

Sipas vlerësimeve të Konfederatës, me pragun e ri rreth 40 mijë të vetëpunësuar do të mund të sigurohen për herë të parë.

Lehtësi edhe për ata që punojnë me orar të pjesshëm

Rregullorja e re parashikon gjithashtu që kompanitë e sigurimeve të mund ta përshtatin pragun minimal në varësi të shkallës së punësimit të personave të vetëpunësuar që punojnë me orar të pjesshëm.

Kjo është veçanërisht e rëndësishme për sektorë si kultura, ku nuk është e pazakontë që një person të ketë njëkohësisht disa angazhime me orar të pjesshëm – si punëmarrës, i vetëpunësuar ose në të dyja format.

Ndryshimet synojnë t’u mundësojnë më shumë të vetëpunësuarve në Zvicër qasje në mbrojtjen financiare që ofron sigurimi nga aksidentet.

Rregullorja e re hyn në fuqi më 1 janar 2027.

The post Zvicra lehtëson sigurimin nga aksidentet për të vetëpunësuarit, përfitojnë rreth 40 mijë persona appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.