Zvicra përballet me rritje rekord të bllokimeve në trafik, mbi 55 mijë orë në vitin 2024

Në vitin 2024, në rrugët kombëtare të Zvicrës janë regjistruar mbi 55,500 orë bllokime trafiku, duke shënuar një rritje prej gati 14% krahasuar me një vit më parë. Këto të dhëna u publikuan nga Zyra Federale për Rrugët (Astra), e cila njoftoi se shkaku kryesor i kësaj situate mbetet trafiku i rënduar, ndërsa vetëm 4% e bllokimeve vijnë nga punimet rrugore.

Megjithëse rrugët kombëtare përbëjnë vetëm 4% të gjithë rrjetit rrugor në vend, ato përballojnë mbi 40% të volumit të qarkullimit, me 29.8 miliardë kilometra të përshkuara nga automjetet në vitin që lamë pas, transmeton albinfo.ch.

Astra thekson se rritja e bllokimeve është një sinjal i qartë se rrjeti rrugor po arrin kufijtë e kapacitetit të tij. Për këtë arsye, po ndërmerren masa të reja për menaxhimin e trafikut dhe mirëmbajtjen afatgjatë të rrjetit rrugor.

Ndërkohë, ETH Cyrih është duke analizuar projektet e ardhshme të zgjerimit të infrastrukturës rrugore dhe hekurudhore. Rezultatet priten në tremujorin e tretë të këtij viti dhe pritet të ndikojnë në vendimmarrjen për politikat e transportit në të ardhmen.

The post Zvicra përballet me rritje rekord të bllokimeve në trafik, mbi 55 mijë orë në vitin 2024 appeared first on Albinfo.