Zvicra ndër vendet më të mira në botë për pensionistët, por humb një pozitë

Zvicra vazhdon të jetë në mesin e vendeve më të favorshme në botë për të kaluar vitet e pensionimit, megjithëse këtë vit ka humbur një pozitë në renditjen ndërkombëtare.

Sipas “Global Retirement Index 2026”, të publikuar nga Natixis Investment Managers në bashkëpunim me CoreData Research, Zvicra renditet në vendin e katërt në botë, me rezultat të përgjithshëm prej 79 për qind.

Në krye të renditjes është Norvegjia, me 83 për qind, e ndjekur nga Irlanda me 81 për qind dhe Holanda me 79 për qind. Edhe Zvicra ka rezultat të rrumbullakosur prej 79 për qind, por Holanda renditet përpara saj. Në vendin e pestë ndodhet Danimarka.

Zvicra ishte e treta në renditjen e vitit të kaluar, ndërsa në vitin 2024 kishte zënë vendin e parë, shkruan swissinfo.ch, transmeton albinfo.ch.

Shëndetësia, një nga pikat më të forta

Indeksi analizon 44 vende dhe merr parasysh 18 tregues, të ndarë në katër kategori kryesore: financat gjatë pensionit, mirëqenia materiale, shëndetësia dhe cilësia e jetës.

Zvicra është në dhjetëshen e parë në tri nga katër kategoritë. Ajo renditet e dyta për shëndetësi, e treta për financat gjatë pensionit dhe e teta për cilësinë e jetës.

Rezultati i Zvicrës në kategorinë e shëndetësisë është përmirësuar nga 91 në 93 për qind, ndërsa në cilësinë e jetës është rritur nga 80 në 82 për qind. Në financat gjatë pensionit rezultati ka mbetur i qëndrueshëm në 74 për qind.

Një tjetër tregues pozitiv është jetëgjatësia: sipas indeksit të këtij viti, Zvicra zë vendin e parë në botë për jetëgjatësi.

Rënie në mirëqenien materiale

Pika ku Zvicra ka humbur më së shumti terren është mirëqenia materiale. Në këtë kategori, vendi ka rënë me tetë pozita, duke u renditur në vendin e 15-të.

Pavarësisht kësaj rënieje, rezultati i përgjithshëm e mban Zvicrën në grupin e vendeve me kushtet më të favorshme për sigurinë dhe mirëqenien gjatë pensionimit.

Raporti gjithashtu thekson se siguria financiare e pensionistëve po përballet me presione në rritje në shumë vende. Plakja e popullsisë, nivelet e larta të borxhit publik dhe inflacioni janë ndër faktorët që po ushtrojnë presion mbi sistemet e pensioneve.

Për pjesën zvicerane të studimit janë marrë parasysh edhe përgjigjet e 400 investitorëve individualë zviceranë, të anketuar në vitin 2025, si dhe të 150 këshilltarëve financiarë, të anketuar në vitin 2026.

The post Zvicra ndër vendet më të mira në botë për pensionistët, por humb një pozitë appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.