Zyrtarët e BE-së dhe SHBA-së bisedime për tarifat gjithëpërfshirëse të Trump

Përfaqësuesit kryesorë nga Bashkimi Evropian dhe SHBA-ja zhvilluan sot një videokonferencë për të diskutuar mbi tarifat gjithëpërfshirëse të presidentit, Donald Trump për importet evropiane.

Komisioneri i Tregtisë së BE-së Maros Sefcovic tha se kishte biseduar për dy orë me sekretarin e Tregtisë së SHBA-së, Howard Lutnick dhe përfaqësuesin e Tregtisë së SHBA-së, Jamieson Greer.

Sefcovic, duke shkruar në X, e përshkroi diskutimin si “të sinqertë”.

“Isha i qartë, tarifat e SHBA-së janë të dëmshme, të pajustifikuara”, shkroi ai.

“Marrëdhënia tregtare BE-SHBA ka nevojë për një qasje të re. BE-ja është e përkushtuar ndaj negociatave domethënëse, por gjithashtu e përgatitur për të mbrojtur interesat tona”, tha ai.

“Ne qëndrojmë në kontakt”, shtoi Sefcovic. Nuk u dhanë menjëherë detaje të tjera nga asnjëra palë.

Trump njoftoi të mërkurën një tarifë bazë prej 10% për pothuajse çdo vend në botë, por shumë prej tyre janë subjekt i tarifave shumë më të larta.

BE-ja u godit nga një taksë prej 20% për mallrat e saj të eksportuara në SHBA.