100 ditë kaos në Milanello – Allegri përjeton startin më të vështirë!

Kanë kaluar 100 ditë që kur Massimiliano Allegri u rikthye në pankinën e AC Milan, por periudha e tij e parë në këtë aventurë të dytë ka qenë gjithçka tjetër përveçse e qetë.

Allegri u prezantua më 30 maj dhe pritej që të kishte kohë të mjaftueshme për të ndërtuar themelet e projektit të ri kuqezi. Megjithatë, merkatoja e pasigurt dhe problemet e skuadrës kanë bërë që atmosfera të kthehet në një rrëmujë të vërtetë, përcjell ORAinfo.

Për më tepër, humbja befasuese në javën e parë kundër Cremonese ka vënë në dyshim gjendjen e skuadrës, duke errësuar edhe më shumë pritshmëritë pozitive që u panë gjatë fazës përgatitore.

Në këtë pikë, ndeshja e radhës kundër Bolognës në “San Siro” merr një rëndësi të madhe, pasi një fitore është e domosdoshme për të nisur ndërtimin e momentumit. Edhe pse Scudetto nuk shihet si objektivi kryesor, sigurimi i një vendi në katërshen e parë duket një sfidë e vështirë që do të kërkojë përkushtim maksimal nga Allegri dhe lojtarët e tij. /ORAinfo/