Abdixhiku: Seanca nuk duhej ndërprerë pasi kishte kuorum të mjaftueshëm për votim

Në një deklaratë, kryetari i LDK-së, Lumir Abdixhiku, ka thënë se kryesuesi i seancës konstituive të Kuvendit, Avni Dehari, e ndërpreu seancën pa të drejtë dhe kundër Rregullores së Kuvendit, përcjell albinfo.ch.

Ai është shprehur se seanca nuk duhej ndërprerë pasi kishte kuorum të mjaftueshëm për votim dhe duhej të vazhdohej me pikën e parë të rendit të ditës, miratimin e Raportit për Verifikimin e Mandateve.

“Qytetarët e kanë shumë qartë kush janë bllokuesit e vërtetë. Kryesuesi që rastis të jetë më i vjetri në moshë, rastisi të jetë nga partia e parë, veproi kundër Rregullores së Kuvendit, kundër praktikës kushtetuese, pa të drejtë ndërpriti seancën e sotme ndonëse kishte kuorum të mjaftueshëm, ndonëse kishte kushte për votimin… Është për keqardhje kjo praktikë bllokuese për institucionin më të lartë. Kjo është shkelje e rëndë, praktikë e rëndë, është sjellje e mbrapshtë politike”, u shpreh Abdixhiku.

Kryetari i LDK-së ka thënë se do të mblidhen pas 48 orëve dhe do t’i shprehin në Kuvend këto shkelje. 

LDK-ja më pas ka reaguar në Facebook ku ka thënë se ka pasur kuorum për votimin e raportit të Komisionit, por se VV-ja e bllokoi procesin përpara konstituimit të Kuvendit.

Kryesuesi Avni Dehari e mbylli seancën e sotme konstituive pa hedhur fare në votim pikën e parë të rendit të ditës, raportin e Komisionit për verifikim të kuorumit dhe mandateve. Është hera e dytë që dështon seanca konstituive. Kuvendi do të mblidhet të shtunën në orën 12:00.

The post Abdixhiku: Seanca nuk duhej ndërprerë pasi kishte kuorum të mjaftueshëm për votim appeared first on Albinfo.