AGK dënon fushatën e vazhdueshme kundër mediave nga kryeministri Kurti dhe partia e tij

Asociacioni i Gazetarëve të Kosovës e ka dënuar fushatën e vazhdueshme kundër mediave dhe gazetarëve nga kryeministri Albin Kurti dhe Lëvizja Vetëvendosje.

Sipas njoftimit, në vazhdimësi të 4 viteve të qeverisjes, Lëvizja Vetëvendosje dhe lideri i saj, kryeministri Albin Kurti, kanë intensifikuar sulmet e papranueshme ndaj mediave dhe gazetarëve gjatë gjithë muajit të fushatës elektorale, për zgjedhjet nacionale të 9 shkurtit.

“Në një intervistë për një televizion lokal, kryeministri Kurti ka thënë se “portalet janë pjesë e Trekëndëshit të Bermudës që duan ta fundosin Kosovën”. Pothuajse në të gjitha tubimet zgjedhore në qytete të ndryshme, Kurti ka përdorur gjuhë denigruese dhe sulmuese ndaj mediave, gazetarëve dhe komentatorëve të debateve televizive. Ekipe gazetarësh, duke përfshirë ata të Klan Kosova dhe Nacionale, janë penguar nga zyrtarë të Vetëvendosjes në disa tubime zgjedhore, në përpjekje për të pamundësuar raportimin nga terreni”, thuhet në njoftim, transmeton albinfo.ch.

Tutje, AGK-ja konsideron se sulme të tilla janë presion i papranueshëm ndaj mediave që të bëjnë punën e tyre, në një fazë të rëndësishme siç është kjo e fushatës zgjedhore. Gjuha nxitëse nga ana e partisë në pushtet e vështirëson ndjeshëm mundësinë e raportimit. Bojkoti i Vetëvendosjes ndaj 3 televizioneve nacionale gjithashtu ka ndikim në ofrimin e transparencës dhe është shmangie e llogaridhënies ndaj një pjese të rëndësishme të publikut.

The post AGK dënon fushatën e vazhdueshme kundër mediave nga kryeministri Kurti dhe partia e tij appeared first on Albinfo.