Aksion në tri lokale në Prishtinë, Dogana ndalon mbi 23 mijë artikuj të ndryshëm, njoftohet edhe Prokuroria Themelore

Dogana e Kosovës, ka njoftuar se ka ndaluar 23,918 artikuj në tri lokale të Prishtinës.

Në njoftim shtohet se, ndër mallrat e ndaluar janë 16,394 mbrojtëse për telefona, kufje, kabllo, adapterë, orë inteligjente, lapsa elektronik, tastierë e artikuj të tjerë.

“Në mallrat e ndaluara janë evidentuar shenja të markave të njohura tregtare, përfshirë Apple, Louis Vuitton, Prada, Gucci dhe Guess. Sipas rezultateve të evidentuara, në lokalin e parë janë ndaluar 22,391 artikuj, në lokalin e dytë 477 artikuj, ndërsa në lokalin e tretë 1,050 artikuj”, thuhet mes tjerash në njoftim.

Njoftimi:

Dogana e Kosovës ndalon 23,918 artikuj në tri lokale në Prishtinë

Prishtinë, 14 gusht 2026 Dogana e Kosovës, në kuadër të aktiviteteve operative dhe kontrolleve ndaj subjekteve tregtare, kanë realizuar kontrolle në tri lokale, ku kanë ndaluar gjithsej 23,918 artikuj të ndryshëm.

Mallrat e ndaluara përfshijnë:

16,394 mbrojtëse për telefona mobilë;

kufje të modeleve AirPods dhe AirPods Max;

kabllo USB-C dhe Lightning;

adapterë dhe pajisje për mbushje;

orë inteligjente;

pajisje AirTag;

lapsa elektronikë;

tastiera dhe aksesorë të tjerë elektronikë; bateri për telefona mobilë.

Në mallrat e ndaluara janë evidentuar shenja të markave të njohura tregtare, përfshirë Apple, Louis Vuitton, Prada, Gucci dhe Guess.

Sipas rezultateve të evidentuara, në lokalin e parë janë ndaluar 22,391 artikuj, në lokalin e dytë 477 artikuj, ndërsa në lokalin e tretë 1,050 artikuj.

Dy nga subjektet e kontrolluara janë referuar për trajtim të mëtejmë në Sektorin për Kundërvajtje Doganore.

Ndërkaq, lidhur me subjektin e tretë, për shkak të sasisë dhe vlerës së lartë të mallrave të ndaluara, është njoftuar Prokuroria Themelore në Prishtinë, ndërsa rasti do të trajtohet në përputhje me udhëzimet e saj.

Të gjitha mallrat janë vendosur nën mbikëqyrje doganore dhe do t’u nënshtrohen procedurave përkatëse për verifikimin e dokumentacionit, prejardhjes së tyre dhe respektimit të legjislacionit doganor dhe të të drejtave të pronësisë intelektuale.

Dogana e Kosovës mbetet e përkushtuar në luftimin e kontrabandës dhe ekonomisë joformale, mbrojtjen e tregut të ligjshëm dhe parandalimin e qarkullimit të mallrave që cenojnë të drejtat e pronësisë intelektuale dhe interesat e konsumatorëve.

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.