Avdijaj gati për finalen e Kupës së Austrisë

Klubi i Hartbergut ka siguruar kalimin në finale të Kupës së Austrisë. Golin e fitores 1:0 në gjysmëfinalen e zhvilluar në Vjenë ndaj Austria Vjenës favorite e shënoi Donis Avdijaj, përcjell albinfo.at.

Futbollisti shqiptar që në të kaluarën ka luajtur për Kosovën, realizoi në minutën e 54-t. Ishte edhe goli që e vendosi sfidën. Por, Avdijaj ka vendosur edhe disa ndeshje në edicionin aktual të Kupës së Austrisë. 

Sulmuesi 28-vjeçari, që aktivizohet kryesisht në krah, ka plot shtatë gola e gjashtë asistime në pesë ndeshje të Kupës. “Sky Sport” i Austrisë i ka kushtuar shkrim të gjatë të enjten skuadrës së Hartbergut, ndërsa në pah ka nxjerrë formën e mirë që po kalon Avdijaj. 

“Është absolutisht çmenduri. Dhe mund ta kuptoj çdo klub të madh që thotë ‘ne nuk jemi kandidatë, por ne jemi kandidatë’. Mendoj se Hartbergu ka treguar paraqitje solide e të madhe në Kupë këtë edicion. Mendoj se ne madje kemi shënuar më së shumti gola. Nëse e analizoni në tërësi këtë sezon të kupës, mendoj se jemi me plot meritë në finale”, ka thënë pas ndeshjes Avdijaj. 

“Finalja e Kupës ka qenë e njohur për Hartbergun vetëm në televizor”, ka shtuar tutje Avdijaj. 

Në finalen që zhvillohet në Klagenfurt, Hartbergu luan ndaj Wolfsbergerit më 1 maj nga ora 17:00.

Njësoj si Wolfsbergeri, edhe Hartbergu është skuadër modeste, që promovimin në elitën e futbollit austriak e arriti në edicionin 2017/18. Wolfsbergeri e siguroi Bundesligën austriake për herë të parë në edicionin 2011/12. Të dyja do të luajnë në finale të Kupës së Austrisë për herë të parë dhe e synojnë trofeun e parë në histori të klubit. Rrugës për në finale Hartbergu në raundin e parë fitoi 11:1 ndaj Bischofschofenit. 6:0 e mposhti SV Lafnitzin, kurse 3:0 triumfoi ndaj Austria Lustenaut. 

SV Stripfingun, Hartbergu e mposhti pas vazhdimeve me rezultatin 2:0 dhe triumfoi në gjysmëfinale ndaj Austria Vjenës. Skuadra e Avdijajt ka shënuar plot 23 gola, duke e bërë kështu skuadrën me sulmin më të fortë në këtë edicion të Kupës austriake. Avdijaj është golashënuesi më i mirë i ekipit në Kupë me shtatë gola e gjashtë asistime. Patrik Mijiq i ka gjashtë gola, ndërsa Robert Zulj i Laskut, Karim Konate i Salzburgut, David Toshevski i Austria Klagenfurtit dhe Saliou Sane i Riedit, i kanë nga katër gola në total. Avdijaj tri gola e gjashtë asistime i ka në 23 paraqitje në Bundesligën austriake. Ai i ka zhvilluar gjashtë ndeshje me Kosovën, ndërsa ka kontribuuar me dy gola. Por, nuk është ftuar për kohë të gjatë te “Dardanët”.

The post Avdijaj gati për finalen e Kupës së Austrisë appeared first on Albinfo.