Avni Dehari nga VV dhe Sala Jashari nga PDK do e udhëheqin seancën konstituive të Kuvendit me 15 prill

Presidentja Vjosa Osmani ka thirrur seancën konstituive të legjislaturës së nëntë të Kuvendit të Republikës së Kosovës për datën 15 prill.

“Presidentja e Republikës së Kosovës, Vjosa Osmani, në përputhje me autorizimet kushtetuese dhe afatet ligjore, ka thirrur mbledhjen e parë të legjislaturës së nëntë të Kuvendit të Kosovës për datën 15 prill 2025”, ka thënë Presidenca.

Seanca duhet të drejtohet nga deputeti më i vjetër në moshë dhe ai më i riu.

Në këtë rast kjo seancë do të udhëhiqet nga deputeti i VV-së, Avni Dehari si deputeti më i vjetër dhe nga Sala Jashari si deputetja më e re, raporton FrontOnline.

Se do e udhëheq seancën e nënte konsituive me 15 prill, për FrontOnline e ka konfirmuar edhe vetë deputeti i VV-së, Avni Dehari.

”Po unë do e udhëheqi, sepse nuk ka deputet më të vjetër” tha Dehari.

I pyetur se me kë do e udhëheq këtë seancë, Dehari e konfirmoj se kjo do të bëhet bashkë me deputetën e PDK-së, Sala Jashari, si deputetja më e re.

”Ashtu po flitet se ajo është” tha Dehari.

Pastaj çdo parti cakton një anëtar në Komisionin e Përkohshëm për Verifikimin e Kuorumit dhe Mandateve. Ky komision kontrollon nëse në sallë ka kuorum dhe nëse të gjithë deputetët kanë mandate të vlefshme. Komisioni do të udhëhiqet nga një deputet i Lëvizjes Vetëvendosje.

Pas votimit të raportit të komisionit, vazhdohet me betimin.

Më pas votohet Kryetari i ri i Kuvendit, që duhet propozohet nga partia më e madhe parlamentare. Zgjedhja bëhet me shumicën e votave të të gjithë deputetëve. Nëse zgjidhet, ai menjëherë merr drejtimin e seancës.

Pastaj bëhet zgjedhja e pesë nënkryetarëve: tre propozohen nga tri partitë më të mëdha (LVV, PDK dhe LDK), një nga deputetët e komunitetit serb, dhe një tjetër nga deputetët e komuniteteve të tjera jo-shumicë. Kandidati i subjektit më të madh duhet të jetë i gjinisë tjetër nga Kryetari./FrontOnline/