Edhe një premtim i mbajtur nga Ruzhdi Shehu, rruga Junik-Gropa e Erenikut drejt përfundimit

Kryetari i Junikut, Ruzhdi Shehu ka vizituar sot punimet në rrugën Junik-Gropa e Erenikut, rrugë kjo që do të lidh zonat malore e rurale me qytetin dhe do të krijojë kushte të favorshme për zhvillim ekonomik dhe turistik.

Juniku njihet për bjeshkë dhe male që ofrojnë kushte të jashtëzakonshme për turizëm dhe tashmë një numër i madh turistësh ndërkombëtarë e vizitojnë këtë zonë çdo vit.

Postimi i plotë i Ruzhdi Shehut:

 Sot pata kënaqësinë të vizitoj punimet në rrugën Junik – Gropa e Erenikut, ku puna po zhvillohet me përkushtim dhe intensitet të lartë.

Ky projekt është një ndër investimet e rëndësishme për komunën tonë, i cili synon të përmirësojë ndërlidhjen e zonave rurale me qytetin dhe të krijojë kushte më të mira për zhvillimin ekonomik dhe turistik.

 Përmirësimi i infrastrukturës mbetet prioritet i yni, duke qenë të vetëdijshëm se çdo investim i tillë ndikon drejtpërdrejt në rritjen e mirëqenies së qytetarëve dhe në rritjen e mundësive për zhvillim të qëndrueshëm.

 Rruga Junik – Gropa e Erenikut pritet të përfundojë në gjysmën e dytë të këtij viti dhe do të sjellë përfitime konkrete për banorët dhe vizitorët e shumtë të zonës.

 Jemi të vendosur të vazhdojmë me projekte të tilla që forcojnë zhvillimin dhe rrisin cilësinë e jetës për të gjithë qytetarët tanë.