Erdogan: Turqia do të punojë për të vendosur një paqe të qëndrueshme dhe të drejtë në Ukrainë

Presidenti turk Rexhep Tajip Erdogan tha me rastin e përvjetorit të tretë të fillimit të luftës në Ukrainë, se Ankaraja qëndron në krah të “popullit mik ukrainas” dhe do të punojë për të vendosur një paqe të qëndrueshme dhe të drejtë.

“Ashtu siç ne deklaruam kundërshtimin tonë ndaj luftës kur filloi konflikti tre vjet më parë, sot jemi të vendosur të bëjmë çdo përpjekje për t’i dhënë fund luftës përmes negociatave.
Duke bërë këtë, ne vazhdojmë mbështetjen tonë të fortë për integritetin territorial, sovranitetin dhe pavarësinë e Ukrainës,” tha ai.

Në samitin e liderëve të Platformës së Krimesë, ai theksoi se një paqe e drejtë mund të arrihet vetëm nëse Rusia dhe Ukraina përfaqësohen në mënyrë të barabartë në negociata.

Erdogan vuri në dukje se javën e kaluar në Ankara, ai i përsëriti presidentit ukrainas Volodymyr Zelensky se Turqia dëshironte të presë bisedimet e mundshme midis Ukrainës dhe Rusisë.

 “Ne të gjithë kemi detyrime të rëndësishme për të festuar përvjetorin e paqes, jo të luftës, vitin e ardhshëm,” tha Erdogan./abcnews.al