Fillojnë përgatitjet për renovimin e xhamisë së Tabanocit në Kumanovë, më e vjetra në Ballkan

Afet Jashari, zyrtar i Ministrisë së Kulturës dhe Turizmit të Maqedonisë së Veriut, ka njoftuar se kanë nisur hapat zyrtarë dhe institucionalë për mbrojtjen dhe restaurimin e xhamisë historike në fshatin Tabanoc të Kumanovës, e cila daton nga fundi i shekullit XIV dhe llogaritet ndër më të vjetrat në Ballkan, përcjell INA.

“Një hap i mbarë për mbrojtjen e trashëgimisë kulturore në “Tabanoc” te Kumanoves.
Sot, së bashku me Muftiun e Kumanovës, z. Abedin Imeri, Drejtorin e Qendrës Konservuese dhe përfaqësues të Inspektoratit të Drejtorisë për Mbrojtjen e Trashëgimisë Kulturore, nisëm një hap të rëndësishëm për xhaminë historike të Tabanocit, e cila, sipas të dhënave historike, daton nga fundi i shekullit XIV dhe konsiderohet ndër xhamitë më të vjetra në Ballkan.
Procesi do të vijojë me kujdesin dhe trajtimin e nevojshëm profesional e institucional, me qëllim që kjo dëshmi e rëndësishme e trashëgimisë kulturore të marrë mbrojtjen që meriton.
Me Ministrin e Kulturës dhe Turizmit, z. Sedat Sulejmani, punët e mira dhe kujdesi për trashëgiminë kulturore vijnë për të gjithë, pa dallim. Trashëgimia jonë është përgjegjësi e përbashkët – ta ruajmë për brezat që vijnë”, shkroi Afet Jashari.(INA)

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.