Franca si SHBA, kërkon mineralet e rralla të Ukrainës

Si Shtetet e Bashkuara të Amerikës, gjithashtu edhe Franca po kërkon qasje në depozitat e mineralëve të rëndësishëm të Ukrainës, dhe negociatat kanë nisur prej muajsh, tha ministri i Mbrojtjes i Francës.

Kjo vjen ndërsa pritet që presidenti ukrainas, Volodymyr Zelensky të vizitojë Uashingtonin këtë javë për të nënshkruar një marrëveshje për mineralet me SHBA-në.

Por, edhe Franca është në bisedime me Ukrainën – Sebastien Lecornu i tha France Info se “ne po flasim për këtë çështje për nevojat tona franceze”.  Ai shtoi se kishte biseduar me homologun ukrainas që nga tetori për një marrëveshje të mundshme.

“Kemi industri mbrojtjeje që do të kenë nevojë për qasje në një numër materialesh të papërpunuara në vitet që vijnë”, shtoi ministri francez.

Theksojmë se presidenti amerikan, Donald Trump e ka paraqitur marrëveshjen si një mundësi për Kievin që të kthejë ndihmat miliarda dollarëshe që ka pranuar nga Amerika që nga pushtimi i plotë i Rusisë në vitin 2022.

Por, ky nuk është motivi pas një marrëveshjeje franceze, shtoi Lecornu, “ne nuk po kërkojmë shpërblim. Por, sektori ynë i mbrojtjes do të ketë nevojë për një numër materialesh të papërpunuara që janë absolutisht thelbësore për sistemet tona të armëve për 30 ose 40 vitet e ardhshme”

Ndryshe, Ukraina është e pasur me elemente të tokës së rrallë dhe minerale të rëndësishme për teknologjitë e ndryshme, përfshirë litium për bateri dhe uranium për energjinë bërthamore, pajisjet mjekësore dhe armët.