Gjermani, policia heton fushatën e biletave të avionit të AfD

Një logo e partisë gjermane të ekstremit të djathtë AfD

Partia e ekstremit të djathtë AfD është e njohur për qëndrimet e saj të vijës së ashpër ndaj migracionit.

Policia gjermane ka hapur një hetim penal pasi një degë lokale e partisë së ekstremit të djathtë Alternativa për Gjermaninë (AfD) shpërndau rreth 30.000 bileta avioni false në qytetin jugperëndimor të Karlsruhes për të promovuar “deportimin”.

Broshurat, të krijuara për t’u dukur si kartat klasike të imbarkimit të linjave ajrore, reklamojnë një fluturim me një drejtim nga “Gjermania” në një “vend të sigurt origjine” për një pasagjer me emrin “emigrant ilegal” më 23 shkurt, në datën e zgjedhjeve parlamentare në Gjermani.

Një zëdhënës i AfD në Karlsruhe konfirmoi se nisma ishte pjesë e fushatës zgjedhore lokale të partisë dhe tha se fletëpalosjet po shpërndaheshin për të gjithë votuesit me të drejtë vote.

AfD e ekstremit të djathtë “tregon ngjyrat e saj të vërteta”, sipas Partisë E Majta

Politikanë nga dega lokale e Partisë gjermane E Majta thanë se fletët ishin gjetur në kutitë postare të banorëve të Karlsruhes me prejardhje migrimi. Zyrtarët e Partisë E Majta thanë se do të ngrinin padi për nxitje urrejtjeje.

Sahra Mirow, kryetarja rajonale e Partisë së Majtë në landin e Baden-Württemberg-ut, ku ndodhet Karlsruhe, tha se AfD “po tregonte ngjyrat e saj të vërteta” me fushatën e fletëpalosjeve. “Ata po ndajnë shoqërinë tonë dhe po përhapin urrejtje,” shtoi ai.

Kryebashkiaku i Karlsruhes, Frank Mentrup i Socialdemokratëve të qendrës së majtë (SPD) tha gjithashtu se AfD kishte kaluar një vijë të kuqe, dhe i tha transmetuesit publik lokal SWR se gjetja e “shënimeve të tilla në kutinë postare përforcon një ndjenjë pasigurie dhe frike”.

Në Berlin të mërkurën, një zëdhënës i qeverisë federale e quajti fushatën “pa shije”, por tha se çdo hetim ishte përgjegjësi e autoriteteve kompetente.

Biletat për “riemigrimin” të AfD-së

“Biletat”, të cilat mund të shkarkohen edhe nga faqja zyrtare e AfD-së në Karlsruhe, përfshinin slogane të tilla si “Është mirë edhe në shtëpi” dhe “Vetëm riemigrimi mund ta shpëtojë Gjermaninë”.

“Riemigrimi” është një koncept i ekstremit të djathtë i popullarizuar në qarqet etno-nacionaliste evropiane, që i referohet dëbimit të detyruar ose të inkurajuar të emigrantëve – dhe madje edhe pasardhësve të emigrantëve që mund të kenë lindur në Evropë, por që grupet e ekstremit të djathtë nuk i konsiderojnë që janë “etnikisht” evropianë – në vendet e origjinës të paraardhësve të tyre.

Koncepti ishte një temë diskutimi e paraqitur nga identitari austriak Martin Sellner në një takim sekret të ekstremistëve të djathtë në Potsdam, afër Berlinit, në nëntor 2023, ku morën pjesë anëtarë të AfD. Lajmi i takimit ngjalli atëherë protesta mbarëkombëtare kundër së djathtës ekstreme dhe çoi në humbje të moderuara të mbështetjes për AfD-në, humbje që partia tani i ka rikuperuar në masë të madhe.

Qeveria gjermane pohon se emigrantët janë jetikë për ekonominë

“Fakti që AfD me sa duket dëshiron të dëbojë njerëzit masivisht nën termin ‘riemigrim’ tregon jo vetëm përbuzjen e saj për humanizmin, por edhe sa do të dëmtonte Gjermaninë si një vend biznesi dhe sa vende pune do t’i kushtonte Gjermanisë, ” tha Ministrja e Brendshme e Gjermanisë, Nancy Faeser për gazetën Rheinische Post të mërkurën.
Faeser vuri në dukje se pothuajse 25 milionë njerëz në Gjermani – rreth 30% e popullsisë – kanë një prejardhje migranti.

“Emigrantët kanë qenë një pjesë integrale e shoqërisë sonë për një kohë të gjatë dhe e bëjnë vendin tonë të funksionojë në shumë fusha: në spitale dhe në azile pleqsh, në kompani dhe në industri. Ajo që bëjnë këta njerëz meriton më shumë respekt,” tha Faeser, ministre nga radhët e SPD.

Bie shifra neto e migrantëve të ardhur në Gjermani

Nga ana tjetër, raporti i fundit i Zyrës Federale për Migrimin dhe Refugjatët (BAMF) tregon se migrimi neto drejt Gjermanisë ka rënë me pothuajse 55% në vitin 2023, ndërsa kërkesat për azil në vitin 2024 kanë rënë me pak më shumë se 30%, krahasuar me 2023.

Numri i kalimeve të parregullta të kufijve të jashtëm të Bashkimit Evropian gjithashtu ra ndjeshëm në vitin 2024, sipas Frontex-it, agjencisë së kontrollit kufitar të BE.

A mund ta përsërisë Gjermania të kaluarën e saj naziste?
Sidoqoftë, AfD mbetet e dyta në sondazhet përpara zgjedhjeve të shkurtit, pas kristjandemokratëve, CDU.

Megjithatë, Alice Weidel e AfD-së ka pak shanse për t’u bërë kancelare apo edhe për të hyrë në qeveri, pasi asnjë parti demokratike nuk është treguar e gatshme të krijojë një koalicion me AfD-në. Tre nga degët rajonale të partisë, edhe pse jo në landin e Baden-Württemberg-ut, janë klasifikuar si “të djathta ekstreme” nga shërbimi informativ gjerman./DW