Kina: Çdo tarifë tjetër nga SHBA do të shkaktonte kundërmasa shtesë që synojnë mallrat amerikane

Pekini ka treguar se do të qëndrojë “i palëkundur përballë kërcënimeve të reja nga Donald Trump”.

Ministria e Tregtisë e Kinës tha se çdo tarifë tjetër nga SHBA do të shkaktonte “kundërmasa” shtesë që synojnë mallrat amerikane.

Në një deklaratë me shkrim ajo akuzoi administratën Trump për shantazh dhe tha se “nëse SHBA këmbëngul në këtë mënyrë, Kina do ta luftojë atë deri në fund”.

Ajo gjithashtu reagoi ndaj pretendimit të Donald Trump se tarifat e tij janë “reciproke” duke thënë se ato ishin “të pabaza” dhe “një praktikë tipike bullizmi e njëanshme”.

Sipas një shkrimi të BBC, duke mbajtur një qëndrim të vendosur kundër “kaosit tregtar global të nxitur nga Trump”, Kina gjithashtu mund të shpresojë të tërheqë jo vetëm mbështetje politike ndërkombëtare, por edhe vëllime shtesë tregtare nga partnerë të rinj, të cilët mund të kompensojnë disa nga humbjet e shitjeve në Amerikë.

Por, siç theksohet në shkrim, Partia Komuniste nuk ka vërtet nevojë për një luftë tregtare tani. Ajo vjen në një kohë të presioneve të larta ekonomike në vend.

Politikëbërësit tashmë po përpiqeshin të rrisnin konsumin e brendshëm, me një ekonomi të plogësht që rrëmbehej nga vitet e një krize të madhe pronash dhe papunësia e vazhdueshme e të rinjve.

Kështu, tani ajo po përballet me një kolaps të mundshëm në tregtinë me superfuqinë tjetër të botës.

Megjithatë, Partia Komuniste Kineze i ka dërguar sot një mesazh të sigurt popullatës kineze, në formën e një editoriali në gazetën “People’s Daily”.

“Kina ka guximin dhe besimin për t’u përballur me ndikimin… është plotësisht e aftë të përballojë këto sfida”, citohet të jetë thënë aty.