Kosovë: Policia me plan për ndalimin e përdorimit të telefonit gjatë vozitjes

Përdorimi i telefonit gjatë vozitjes po rezulton të jetë një nga shkaktarët kryesorë të aksidenteve në komunikacion. Shefi i Njësisë së Trafikut Rrugor në Prishtinë, Vedat Zuka, ka bërë të ditur se rreth 50% e aksidenteve në trafik lidhen me përdorimin e telefonit, duke e cilësuar këtë sjellje si një kërcënim serioz për sigurinë publike, transmeton albinfo.ch.

Në një intervistë për Ekonomia Online, Zuka tha se policia ka hartuar një plan operativ të posaçëm për të parandaluar këtë dukuri gjithnjë e më shqetësuese.

“Telefoni është jashtëzakonisht i rrezikshëm gjatë vozitjes. Ne kemi hartuar një plan operativ dhe policia është aktivizuar në terren. Bëj apel të gjithë vozitësve që të mos e përdorin telefonin, sepse kjo mund të shkaktojë pasoja të rënda”, deklaroi ai.

Vetëm gjatë ditës së diel, në kryeqytet janë shqiptuar afro 60 gjoba ndaj vozitësve që janë kapur duke përdorur telefonin gjatë drejtimit të automjetit.

“Këto janë vetëm në Prishtinë, pa përfshirë qytetet e tjera. Kemi rritur aktivitetet për shkak të shtimit të ndjeshëm të numrit të aksidenteve që ndodhin si pasojë e shpërqendrimit nga telefoni”, theksoi Zuka.

Ai gjithashtu vuri në dukje se një pjesë e konsiderueshme e shoferëve përdorin telefonin jo vetëm për të folur, por edhe për të shkruar mesazhe dhe për të qëndruar aktiv në rrjetet sociale, duke e shtuar rrezikun në trafik, transmeton albinfo.ch.

“Nëse dilni në qytet, do të shihni shoferë që shkruajnë mesazhe apo qëndrojnë në rrjete sociale gjatë vozitjes. Kjo është shqetësuese dhe sjell pasoja për të gjithë pjesëmarrësit në trafik”, përfundoi ai.

Policia e Kosovës u bën thirrje të gjithë qytetarëve që të tregojnë kujdes dhe përgjegjësi, duke shmangur përdorimin e telefonit gjatë vozitjes dhe duke kontribuar kështu në rritjen e sigurisë rrugore, përcjell albinfo.ch.

The post Kosovë: Policia me plan për ndalimin e përdorimit të telefonit gjatë vozitjes appeared first on Albinfo.