A do të largohen sponsorët nga Granit Xhaka në Zvicër?
Pas pranimit nga Granit Xhaka se kishte siguruar një certifikatë të falsifikuar vaksinimi gjatë pandemisë, vëmendja është përqendruar edhe te ndikimi që kjo çështje mund të ketë në imazhin e tij dhe marrëdhëniet me sponsorët, transmeton albinfo.ch.
Eksperti i marketingut Christian Kies, në një analizë për “20 Minuten”, e konsideron dëmin ndaj imazhit të Xhakës si të konsiderueshëm. Sipas tij, ndikimi nuk lidhet vetëm me aspektin ligjor, por edhe me atë simbolik, pasi Xhaka është kapiten i Kombëtares së Zvicrës dhe përfaqëson lidershipin dhe autenticitetin.
Kies vlerëson se çështja e certifikatës së falsifikuar bie në kundërshtim me imazhin që një sportist në këtë pozitë duhet të përcjellë. Ai e krahason rastin me atë të trajnerit të hokejit në akull, Patrick Fischer, i cili kishte përdorur një certifikatë të falsifikuar për të shmangur karantinën. Sipas ekspertit, në rastin e Xhakës situata është më e vështirë për t’u justifikuar, pasi certifikata, sipas informacioneve të bëra publike, nuk ishte e nevojshme që ai të luante.
Megjithatë, Kies nuk e sheh situatën si të pakthyeshme. Sipas tij, Xhaka mund ta rikthejë besimin nëse tani komunikon në mënyrë të hapur, të sinqertë dhe proaktive lidhur me rastin.
Pyetja nëse sponsorët do të ndërpresin bashkëpunimin me kapitenin e Zvicrës mbetet e hapur. Një vendim i tillë do të varet nga reagimi i kompanive individuale dhe nga mënyra se si do të zhvillohet më tej çështja.
Ndërkohë, presidenti i Federatës Zvicerane të Futbollit (SFV), Peter Knäbel, dhe drejtori i ekipit kombëtar, Pierluigi Tami, kanë shprehur mbështetjen e tyre për Xhakën dhe e kanë konsideruar atë të përshtatshëm për të vazhduar si kapiten.
Xhaka pritet të merret në pyetje nga Prokuroria e Lucernës në fillim të tetorit, ndërsa procedura ligjore ndaj tij vazhdon./Albinfo.ch
The post A do të largohen sponsorët nga Granit Xhaka në Zvicër? appeared first on Albinfo.
Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.
