Ministri Andonovski do të prezantojë detajet e Raportit të KE-së për progresin në transformimin digjital

Ministri i Transformimit Digjital, Stefan Andonovski, sot do të mbajë konferencë për shtyp kushtuar Raportit të Komisionit Evropian, me një shqyrtim të progresit në fushën e transformimit digjital.

Konferenca për shtyp do të mbahet në Qendrën për Media të Qeverisë së Republikës së Maqedonisë.

Në raportin e progresit të vendit për vitin 2026, në Kapitullin 10 – Transformimi Digjital dhe Mediat, Komisioni Evropian vëren “progres të mirë” dhe rrit nivelin e përgatitjes së vendit.

“Komisioni Evropian ka njohur progresin në digjitalizimin e Maqedonisë. Nga vlerësimi i “progresit të kufizuar” në periudhën 2021 – 2024 përmes “një progresi të caktuar” në vitin 2025, deri te “progresi i mirë” këtë vit. Pas këtij ndryshimi qëndrojnë shumë punë, një ekip i përkushtuar dhe rezultate konkrete. Më shumë shërbime elektronike dhe përdorim i dyfishuar nga qytetarët. Shkëmbim më i mirë i të dhënave elektronike midis institucioneve. Siguri kibernetike e forcuar. Ligje dhe strategji të reja të përafruara me standardet evropiane”, deklaroi Andonovski në një postim në “Fejsbuk”.

Nga Ministria, pas publikimit të Raportit, treguan se KE-ja i njeh rezultatet konkrete në harmonizimin legjislativ, zgjerimin e shërbimeve elektronike, forcimin e ndërveprimit dhe sigurisë kibernetike.

Reformat kryesore përfshijnë miratimin e një strategjie afatgjatë të TIK-ut me një plan veprimi dhe një strategji të sigurisë kibernetike, miratimin e ligjeve mbi komunikimet elektronike dhe mbi sigurinë e rrjeteve dhe sistemeve të informacionit, si dhe ndryshimet legjislative mbi dokumentet elektronike, identifikimin elektronik dhe shërbimet e besimit. Përshtatja e mëtejshme në fushën e komunikimeve elektronike përfaqëson një hap të rëndësishëm drejt rregullave dhe standardeve evropiane.

“Rezultatet janë të dukshme edhe në shërbimet e përdorura nga qytetarët dhe kompanitë. Komisioni Evropian arriti në përfundimin se përdorimi i shërbimeve elektronike është dyfishuar krahasuar me vitin e kaluar. Sipas të dhënave të përfshira në raport, në fund të gushtit 2026, gjithsej 338 shërbime elektronike ishin të disponueshme në portalin kombëtar, duke përfshirë edhe shërbime pjesërisht të disponueshme. Është njohur edhe futja e shërbimeve që qytetarët i kërkojnë më shpesh, siç janë ekstraktet e regjistrit civil dhe certifikatat e shtetësisë, si dhe përmirësimi i aksesit në shërbime për bizneset”, thonë nga Ministria.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.