“Mos ma ço zërin” – përplasje e fortë verbale mes Laertit dhe Gjestit në gjysmëfinalen e Big Brother VIP Albania 4

Spektakli gjysmëfinal i “Big Brother VIP Albania 4” u shënua nga një përplasje e fortë emocionale mes Laertit dhe Gjestit, pas publikimit të klipit ku Gjesti, Egli dhe Gerta shiheshin duke vënë në dyshim rrëfimin personal të Laertit për abuzimin seksual që kishte përjetuar në moshën 9-vjeçare.

Teksa tema po diskutohej në studio dhe tensioni sa vinte e rritej, Laerti shpërtheu ndaj Gjestit me zë të lartë, duke e akuzuar për mungesë ndjeshmërie dhe për lëndim të thellë emocional.

“Ti nuk e di çfarë kam kaluar! Si guxon të thuash që kam gënjyer?”, dëgjohej të thoshte Laerti, i frustruar dhe emocionalisht i ngarkuar.

Gjesti reagoi duke i kërkuar të mos i fliste me zë të lartë: “Mos ma ço zërin”, tha ai me një ton të ftohtë, duke e bërë momentin edhe më të tensionuar. Për pak çaste, studioja u kthye në një arenë emocionale ku dhembja personale dhe mendimet e pamatura u përplasën kokë më kokë.

Laerti nuk mundi ta fshehë zhgënjimin dhe tronditjen që ndjeu nga dyshimet që kishin shprehur shokët e tij të shtëpisë.

Ai e cilësoi këtë si një nga momentet më të vështira në eksperiencën e tij brenda shtëpisë, duke theksuar se historia që kishte ndarë kishte kërkuar shumë guxim dhe kishte qenë një hap i rëndësishëm në rrugën e tij të shërimit personal.

Pas debatit, me ndërhyrjen e moderatorit dhe atmosferës së rënduar në studio, Gerta, Egli dhe Gjesti kërkuan falje publike.

Ata pranuan se fjalët e tyre ishin thënë në afekt, pa e menduar thellë se çfarë plage mund të hapnin tek Laerti.